Թրամփը ցանկանում է հանդիպել իր դեմ բողոք ներկայացրած իրազեկչի հետ
ԱՄՆ նախագահ Դոնալդ Թրամփը կիրակի ասել է, որ ցանկանում է հանդիպել հետախուզության աշխատակցի հետ, որն իր դեմ բողոք է գրել վաշինգտոնյան վարչակազմի ղեկավարի եւ ուկրաինացի պաշտոնակից Վլադիմիր Զելենսկու միջեւ հուլիսյան հեռախոսազրույցի պատճառով, տեղեկացնում է ՏԱՍՍ-ը։
«Ինչպես եւ ցանկացած ամերիկացի, ես արժանի եմ հանդիպել ինձ մեղադրողի հետ, հատկապես այն դեպքում, երբ այդ մեղադրողը, այսպես կոչված իրազեկիչը, իդեալական զրույց է ներկայացրել օտարերկրյա առաջնորդի հետ միանգամայն անքաղաքավարի եւ խաբեության ձեւով»,- գրել է Թրամփը Թվիթերում։
Բացի այդ, ԱՄՆ նախագահը ցանկություն է հայտնել հանդիպել մի մարդու հետ, ով իրազեկչին տվյալներ է փոխանցել, որոնք նրա զեկույցի հիմքն են հանդիսացել։ «Ես ուզում եմ հանդիպել ոչ միայն ինձ մեղադրողի հետ, որը տեղեկություն է ներկայացրել երկրորդ, երրորդ, չորրորդ ձեռքից, այլ նաեւ նրա հետ, ով ապօրինաբար նրան է փոխանցել այդ տվյալները, որոնք զգալի չափով ճիշտ չեն։ Այդ մարդը լրտեսել է ամերիկյան նախագահի՞ն։ Լուրջ հետեւանքնե՛ր»,- սպառնացել է Թրամփը։
ԱՄՆ նախագահը նաեւ կոչ է արել «ամենաբարձր մակարդակով հարցաքննել ԱՄՆ Կոնգրեսի Ներկայացուցիչների պալատի հետախուզության հատուկ կոմիտեի նախագահ Ադամ Շիֆին (դեմոկրատ Կալիֆոռնիայի նահանգից) Զելենսկու հետ Թրամփի զրույցի բովանդակությունն աղավաղելու համար։
«Շիֆը ստել է Կոնգրեսին՝ աղավաղելով այն, ինչ ես իրականում ասել եմ։ Նա գրել եւ կարդացել է բաներ, ասել, որ դրանք հնչել են ԱՄՆ նախագահի շուրթերից։ Ես ցանկանում եմ, որպեսզի Շիֆին հարցաքննեն ամենաբարձր մակարդակով խաբեության եւ դավաճանության պատճառով»,- ավելացրել է ԱՄՆ նախագահը: