Շոտլանդիայում հակառասիստական միջոցառման ժամանակ սպիտակամորթ մարդկանց արգելել են հարցեր տալ
Էդինբուրգի համալսարանը, որտեղ կայացել է «Դիմադրություն սպիտակի նկատմամբ» հակառասիստական խմբի կողմից կազմակերպված ասուլիսը, քննադատվել է ռասիզմի դրսևորման համար, գրում է The Telegraph-ը:
Ինչպես նշում է պարբերականը, սկանդալը զարգացել է միջոցառման տարօրինակ նախապայմանի պատճառով. ասուլիսի ժամանակ սպիտակամորթ ռասայի ներկայացուցիչներին արգելել են ելույթ ունենալ եւ հարցեր տալ:
«Մենք չենք փոխանցի բարձրախոսը սպիտակամորթ մարդկանց ոչ թե այն պատճառով, որ չենք համարում, որ նրանք քննարկման համար որեւէ առաջարկ չունեն, այլ այն պատճառով, որ մենք ցանկանում ենք, որ այլ մարդկանց ձայներն ավելի լսելի դառնան»,-նշված է միջոցառման հայտարարության մեջ:
Փոխարենը միջոցառման սպիտակամորթ մասնակիցներին առաջարկվել է կիսվել իրենց գաղափարներով հանձնաժողովի անդամների կամ ասուլիսի մասնակիցների հետ քննարկումից հետո:
Դեռ ավելին, ասուլիսի ժամանակ բաց կլինեն միայն այլ գույնի մաշկ ունեցող մարդկանց համար հասանելի տարածքները:
Այդ նախապայմանը վրդովմունք է առաջացրել, որը լիարժեքորեն արտահայտել է հակառասիստական արշավի մասնակից Ջեյն Մաքոլը՝ հայտարարելով, որ այդ դեպքը չեզոքացնում է հավասարության հասնելու բազմամյա ջանքերը:
«Դուք պատկերացնո՞մ եք, թե ինչ տեղի կունենար, եթե միջոցառումը կոչվեր «Դիմադրություն սեւի նկատմամբ», եւ ոչ սպիտակամորթ մարդկանց արգելեին հարցեր տալ կամ մուտք գործել որոշակի տարածք»,-բավականին պատճառաբանված հարցադրում է արել նա: