Segafredo Trek Yerevan 2019․ Հաղթողները շահեցին բազմաթիվ նվերներ, նաեւ ուղեւորություն Փարիզ (ֆոտոռեպորտաժ)

Շուրջ 150 հեծանվորդներ սեպտեմբերի 28-ին անցան Երեւանի փողոցներով, մասնակցեցին խաղարկությանն ու շահեցին բազմաթիվ նվերներ, այդ թվում ուղեւորություն Փարիզ (ֆոտոռեպորտաժ):

Segafredo Zanetti Armenia ընկերության նախաձեռնությամբ Երեւանում կայացավ ավանդական դարձած Segafredo Trek Yerevan 2019 հեծանվավազքը, որի նպատակն է նպաստել Հայաստանում հեծանվային մշակույթի զարգացմանը:

Segafredo Trek Yerevan 2019 հեծանվավազքին մասնակցում էին տարբեր տարիքի սիրողական եւ պորֆեսիոնալ հեծանվորդներ: Ամենակրտսեր մասնակիցը 1 տարեկան էր։ Փոքրիկը ծնողների հետ մեծերի համար նախատեսված հեծանիվով մասնակցեց երթին: Հեծանվավազքը մրցումային չէր, ուներ սիրողական բնույթ, քանի որ պարտվողներ չէին լինելու:

Հեծանվավազքի մեկնարկից առաջ Երեւանի Աբովյան փողոցում գործող Segafredo սրճարանի բակում մասնակիցների համար կազմակերպվել էր բացօթյա նախավարժանք, որը վարում էին հատուկ հրավիրված ֆիթնես մարզիչներ: 30 րոպե նախավարժանքից հետո «Երևանյան թմբուկներ» խումբը հայտարարեց հեծանվավազքի մեկնարկը:

«Segafredo Trek Yerevan 2019»-ի մասնակիցներն անցան Աբովյան-Հանրապետության հրապարակ-Ամիրյան-Մաշտոց-Ֆրանսիայի հրապարակ- Սայաթ-Նովա – Տերյան – Պուշկին- Աբովյան փողոցներով: Վերջնագիծը Շառլ Ազնավուրի հրապարակն էր, որտեղ էլ կայացավ համերգային ծրագիրն ու խաղարկությունը:

Մասնակիցների համար խաղարկվեցին 2 անձի համար ճանապարհորդություն դեպի Փարիզ Air France-ի կողմից, 1 տարվա անդամակցության քարտ Reebok Sports Club Armenia-ի կողմից, Trek հեծանիվ MyBike.am-ի կողմից, առանձին նվերներ հեծանվավազքի աջակիցների կողմից: Հեծանվավազքի եւ խաղարկության գլխավոր գործընկերը Evokabank-ն էր:

Խաղարկության պայմաններից մեկն այն էր, որ հաղթող մասնակիցները պետք է անպայման այդ պահին գտնվեին Ազնավուրի հրապարակում, հակառակ դեպքում նվերները վերախաղարկվում էին: Այդպես՝ օրինակ վերախաղարկվեց Փարիզի տոմսը, քանի որ առաջին հաղթողը հրապարակում չէր եւ այդպես էլ «չհայտնաբերվեց»:

Segafredo Zanetti Armenia սրճարանների ցանցի մարկեթինգի բաժնի ղեկավար Մելանյա Բաբայանը նշում է, որ արդեն երրորդ տարին անցկացվող հեծանվավազքը քարոզում է առողջ ապրելակերպն ու հեծանիվը որպես փոխադրամիջոց օգտագործելու անցումը Հայաստանում:

«Հեծանվավազքը քարոզում է առողջ ապրելակերպ, հնարավորության դեպքում ավտոմեքենան փոխարինել հեծանիվով եւ պահպանել շրջակա միջավայրը: Segafredo-ի միջազգային ընկերությունն ունի հեծանվային սպորտի «Տրեկ» պրոֆեսիոնալ ակումբ: Հայաստանում «Տրեկի» հովանավորությամբ մասշտաբային միջոցառումների շնորհիվ ենք փորձում հեծանվային մշակույթը զարգացնել»,- ասաց Մելանյա Բաբայանը:

Հեծանվավազքի մասնակցությունը անդամավճարով էր՝ 2500 դրամ: Մասնակցության վճարը կիրառվում էր առաջին անգամ, քանի որ նախորդներում մասնակցությունն անվճար է եղել:

Մելանյայի Բաբայանի խոսքով, մասնակցության վճարները բարեգործական նպատակներով են:

«Բոլորին հետաքրքրում է, թե ինչու է այս տարի մասնակցությունը մուտքավճարով: 2500 դրամը խորհրդանշական գումար է, որը հետագայում բարեգործական նպատակով է օգտագործվելու: Մինչեւ հիմա չէինք ասում, թե ինչ նպատակով ենք օգտագործելու գումարը, բայց Segafredo Zanetti Armenia ընկերությունը հավաքված գումարի ամբողջ հասույթով գնելու է հեծանիվներ Հայաստանի մանկատներից մեկի երեխաների համար»,-նշեց Մելանյա Բաբայանը: