Բրիտանիայի դատարանը հրաժարվել է արտահանձնել Հաջիեւի տիկնոջը. ադրբեջանական դատարանների անկախությունը կասկածելի է

Լոնդոնի դատարանը մերժել է ադրբեջանական իշխանություններին արտահանձնել Ադրբեջանի միջազգային բանկի (ԱՄԲ) նախկին կառավարիչ Ջահանգիր Հաջիեւի տիկնոջը, որն ամուսնու հետ միասին մեղադրվում է առանձնակի խոշոր չափերով դրամական միջոցներ յուրացնելու մեջ, հաղորդում է ՏԱՍՍ-ը՝ հղում կատարելով Financial Times-ին:

Դատարանն ընդունել է ենթադրություններն այն մասին, որ Հաջիեւան, որը բնակվում է Լոնդոնում 2010 թվականից, կարող էր մասնակցել միջոցների լվացման եւ յուրացման սխեմայում, եւ հաշվի չի առել, որ գործը, որը հարուցվել է տիկնոջ նկատմամբ Ադրբեջանում, ունի «քաղաքական շարժառիթներ», ինչպես պնդել են նրա փաստաբանները: Ընդ որում՝ դատավոր Էմմա Արբանթոթը կասկած է հայտնել ադրբեջանական դատարանների անկախության հարցում եւ պատճառաբանել է Հաջիեւային արտանանձնելու մերժումը նրանով, որ հայրենիքում «արդար դատավարության նրա իրավունքը կարող է զարհուրելի կերպով ոտնահարվել»: Ադրբեջանի ներկայացուցիչները մտադիր են բողոքարկել դատարանի կայացրած որոշումը:

Հիշեցնենք, որ անցած տարվա նոյեմբերին Հաջիեւան ձերբակալվել էր Լոնդոնում ադրբեջանական իշխանությունների հարցման հիման վրա, այնուհետեւ ազատ արձակվել 500 հազար ֆունտ ստերլինգի չափով (շուրջ 656 հազար դոլար) գրավի դիմաց: Նա առաջին օտարերկրացի կինն է, որի նկատմամբ Հանցավորության դեմ պայքարի բրիտանական ազգային գործակալությունը կիրառել է «Օրդեր անհայտ ծագման հարստության համար» իրավական մեխանիզմը: Միացյալ Թագավորության իշխանությունները պահանջում են, որ Հաջիեւան բացատրի, թե որտեղից է ձեռք բերել Լոնդոնում ընդհանուր առմամբ 22 մլն ֆունտ ստերիլինգի չափով (28.8 մլն դոլար) անշարժ գույք, ինչպես նաեւ ավելի քան 400 հազար ֆունտ ստերլինգի չափով թանկարժեք ոսկյա զարդեր գնելու միջոցները: Հաջիեւան բողոք է ներկայացրել օրդերի կիրառման համար, որը պետք է դիտարկվի դեկտեմբերին: