Ճնշում են նրան, ով ճնշվում է. եթե դու ճնշվող դատավոր չես, ինչ ուզեն, թող կողքից խոսեն. Ալվինա Գյուլումյան

Չեմ կարող ասել՝ ՍԴ-ի նկատմամբ քաղաքական ճնշումներ կան, թե ոչ: Այս մասին այսօր՝ սեպտեմբերի 27-ին, լրագրողների հետ զրույցում նշեց ՍԴ անդամ Ալվինա Գյուլումյանը:

«Ճնշում են նրան, ով ճնշվում է: Եթե դու ճնշվող դատավոր չես, ինչ ուզեն, թող կողքից խոսեն: Ինձ հնարավոր չի ճնշել, շեղել ճիշտ ուղուց»,-ասաց նա:

Ալվինա Գյուլումյանը հերքեց պնդումը, թե ՍԴ-ում ճգնաժամ կա. «Իհարկե ՍԴ-ում ճգնաժամ չկա: Ճգնաժամը նա կլիներ, եթե մենք գործեր չքննեինք, որոշումներ չկայացնեինք, քվորում չապահովեինք նիստերի համար: Նիստերը տեղի են ունենում, գործերը քննվում են: Ինչ ճգնաժամի մասին է խոսքը»:

Հարցին, թե ինքը ավելի անկաշկանդ է գործել նախորդ իշխանությունների օրոք, թե նոր իշխանություններին, ՍԴ անդամը պատասխանեց. «Ես անկաշկանդ եմ աշխատել բոլոր իշխանությունների օրոք: Որեւէ իշխանության կողմից ինձ ճնշելու փորձ չի եղել, որովհետեւ իշխանությունները երեւի ինձ ավելի լավ են ճանաչել»:

ՍԴ որոշումները կոլեգիալ մարմնի որոշումներ են, որը ենթադրում է, որ դրանք կարող են ընդունվել անգամ 5-4 հարաբերակցությամբ, բայց որոշում է մեծամասնությունը, լրագրողների հետ զրույցում նշեց ՍԴ անդամը՝ անդրադառնալով Ռոբերտ Քոչարյանի գործով ՍԴ կայացրած որոշմանը:

Անդրադառնալով նրան, որ այդ որոշման ժամանակ ՍԴ երկու դատավորներ (Ֆելիքս Թոխյան եւ Արմեն Դիլանյան) հատուկ կարծիք են ներկայացրել, նա ասաց. «Ինձ համար ողջունելի է, որ որեւէ որոշում միաձայնությամբ չի ընդունվում: Այո, կարող են լինել առանձին կամ հատուկ կարծիքներ: Ես հարգում եմ նրանց արտահայտած կարծիքը, ցանկացակ հատուկ կարծիք ուղղված է իրավունքի զարգացմանը»:

Սակայն Ալվինա Գյուլումյանը համաձայն չէ, որ այդ հատուկ կարծիքում նշվել է, որ ՍԴ-ն հապճեպություն է ցուցաբերել. «Ինչ վերաբերում է հապճեպությանը, ես հատուկ կարծիք գրելիս ձեռնպահ կմնայի այդպիսի կարծիք արտահայտելուց: Նախ, դա օրենքից չի բխում: ՍԴ մասին օրենքի համապատասխան, երբ մենք դիմում ենք ստանում, պարտավոր ենք քննարկել 3 ամսվա ընթացքում: Այն կարող է բացառիկ դեպքերում հետաձգվել եւս երեք ամիս: Այսինքն մենք պարտավոր ենք 6 ամսվա ընթացքում որոշում կայացնել: Հիմա մենք որոշում ենք կայացրել 4-րդ ամսում: Դա հապճե՞պ է թե ոչ»:

Անդրադառնալով դիտարկմանը, որ սահմանադրական փոփոխությունների արդյունքում կարող է ՍԴ-ն և Վճռաբեկ դատարանները միավորվեն մեկ մարմնում և ստեղծվի Գերագույն դատարան, Ալվինա Գյուլումյանն ասաց, որ երբ սահմանադրական փոփոխությունների առաջարկները կդրվեն սեղանին, այդ ժամանակ էլ պարզ կլինի ամեն բան:

«Դուք գիտեք, որ Սահմանադրության դատական իշխանության վերաբերյալ գլուխը կարող է փոփոխվել միայն հանրաքվեով: Եթե հանրաքվեի ժամանակ ժողովուրդը հավանություն կտա այդ փոփոխություններին, ես ոչինչ դրա դեմ չեմ կարող ասել:

ՍԴ-ն այն կառույցն է, որի գործունեության հետ կապված միշտ կարող են լինել տարբեր կարծիքներ: Եթե զբաղվենք այդ կարծիքների վերլուծությամբ, ապա կարող ենք առնվազն խախտել մեր քաղաքական չեզոքություն եւ զսպվածություն պահպանելու օրենսդրական պահանջը»,-ասաց նա:

Դիտարկմանը, որ հասարակությունը չի վստահում ՍԴ-ի անաչառությանը, Ալիվինա Գյուլումյանն ասաց. «Ես չեմ կարծում, որ այն 10 հոգին, որ եկան ՍԴ-ի դիմաց կանգնեցին, նրանք հասարակություն են: Հասարակության վստահություն ասելու հմար պետք է լուրջ վերլուծություն կատարենք: Ես չեմ կարող ասել՝ հասարակությունը վստահում է Հրայր Թովմասյանին, թե ոչ: Նման հետազոտություններ ես չեմ կատարել, նման վիճակագրության ես չեմ տիրպետում»: