Վալերի Օսիպյանի ազատումը ինչ-որ փուլում սպասելի էր. Արսեն Այվազյան
Ոչինչ բացառել չի կարելի, ոչինչ հավերժ չէ, ինչն ունի սկիզբ, ունի նաև ավարտ։ Այսօր՝ սեպտեմբերի 27-ին, այսպես պատասխանեց ՀՀ նախկին ոստիկանապետ Վալերի Օսիպյանի՝ ոստիկանապետի պաշտոնից ազատվելու մասին հարցին Քննչական կոմիտեի նախագահի տեղակալ Արսեն Այվազյանը։
«Ոչ մի փոփոխություն ինձ չի զարմացնում, որովհետև կյանքը դինամիկ է, և վերջին շրջանում էլ տեսել ենք բազմաթիվ փոփոխություններ, բազմաթիվ զարգացումներ»,–նշեց նա։
Հարցին՝ սպասելի էր Օսիպյանի ազատումը, Այվազյանը նշեց, «Ինչ–որ փուլում, իհարկե, սպասելի էր»։
Լրագրողները հետաքրքրվեցին՝ Ազգային անվտանգության ծառայության տնօրենի կամ ոստիկանապետի փոփոխությունը չի ազդում համակարգի աշխատանքի վրա, որին ի պատասյան նա ասաց. «Հաշվի առնելով, որ երկար տարիներ աշխատել եմ ոստիկանության համակարգում և քննչական մարմիններում, վստահաբար կասեմ, որ կան պրոֆեսիոնալ կադրեր, որոնք իրենց գործն են անում՝ անկախ նրանից, թե ով է իրենց ղեկավարը»։
Հարցին՝ դատարանների շրջափակմանը ինչպիսի իրավական գնահտական կտա, Այվազյանը պատասխանեց. «Դա պրոցես էր, որը հետևել էր որոշակի զարգացումներին»։
Լրագրողները հետաքրքրվեցին՝ ինչ զարգացումներ նկատի ունի, արդյոք խոսքը ՀՀ երկրորդ նախագահ Ռոերտ Քոչարյանի ազատ արձակման մասին է, նա պնդեց, որ իր մասնավոր կարծիքը չի ցանկանում հայտնել, ապա հավելեց. «Ակցիայով չեմ հետարքրքվել, քննության առարկա չեմ դարձել, թույլ տվեք չպատասխանել հարցին։ Եթե որևէ արտառոց բան լիներ, մենք արձանագրված կունենայինք»։