Վրաստանում կին պատգամավորը ապտակել է մեկ այլ պատգամավորի, այնուհետեւ բացատրել իր արարքը (Տեսանյութ)
Վրաստանի խորհրդարանի իրավաբանական հանձնաժողովի նիստում այսօր միջադեպ է տեղի ունեցել՝ անկախ պատգամավոր Էկա Բեսելիան ապտակել է խորհրդարանական մեծամասնության ներկայացուցիչ Վանո Զարդիաշվիլիին, հայտնում է «Նովոստի-Գրուզիա»-ն։
Բեսելիան կես տարի առաջ աղմուկով լքել է իշխող «Վրացական երազանք» կուսակցությունը, թեեւ այդ կուսակցության առաջնորդներից մեկն էր։ Ազդեցիկ պատգամավորի հակասությունները սկսվել էին դատավորների նշանակման հարցի քննարկումների ժամանակ։ Արդյունքում Բեսելիան հրաժարական էր տվել եւ հեռացել իրավաբանական հանձնաժողովի նախագահի պաշտոնից, կուսակցությունից եւս հեռացել էին 10 պատգամավորներ, որոնց թվում Բեսելիան։
Բացի այդ, Բեսելիան պարբերաբար հայտարարում է, որ հենց իշխող կուսակցությունն է կանգնած ինտերնետում տարածվող գաղտնի նկարահանված իր անձնական կյանքի դրվագներ պարունակող տեսանյութերի հետեւում։ Նա նաեւ հայտարարել է, որ իշխող կուսակցությունը նման տեսանյութերով շանտաժի է ենթարկում տարբեր քաղաքական գործիչների, ինչի հետ կապված՝ պատգամավորին արդեն հարցաքննության են կանչել։
Այսօր վեճը հանձնաժողովի նիստում ծագել է այն բանից հետո, երբ դարձյալ դատավորների նշանակման շուրջ բանավեճի ժամանակ պատգամավոր Գեդեւան Պոպխաձեն, որը նույնպես լքել է կուսակցությունը, Զարդիաշվիլիին ասել է, թե «շատ բան է լսել նրա բարոյականության մասին», վերջինս էլ քմծիծաղով պատասխանել է, որ իր «բարոյական կերպարը հաստատ այնպիսին չէ, ինչպիսին Բեսելիաինը», որից հետո Բեսելիան մոտեցել է Զարդիաշվիլիին եւ ապտակել նրան։ Նիստը վարողը Բեսելիային խնդրել է դուրս գալ դահլիճից։
«Ես ոչ ոքից չեմ պատրաստվում ներողություն խնդրել, յուրաքանչյուր նման անբարոյական սադրանքին պատասխան կտրվի»,- միջադեպից հետո լրագրողներին ասել է Բեսելիան։
Նա համաձայնել է, որ պատգամավորը պարտավոր չէ արձագանքել վիրավորական արտահայտություններին եւ պետք է իրեն զուսպ պահի, սակայն, Բեսելիայի կարծիքով, «կա սահման, որը նա ոչ ոքի թույլ չի տա անցնել»։
«Վանո Զարդիաշվիլին ցածր էր խոսում, որպեսզի մարդիկ չլսեին նրա վիրավորանքները, սակայն ես լսեցի, եւ քանի անգամ նա նման բան ասի, պատասխան կստանա»,- ընդգծել է Բեսելիան։