Երևանն արեց Գախարիային ընդառաջ առաջին քայլը

Սեպտեմբերի 24-ին Վրաստանում ՀՀ դեսպան Ռուբեն Սադոյանը հանդիպում է ունեցել Վրաստանի նորընտիր վարչապետ Գեորգի Գախարիայի հետ։ Վրաստանի վարչապետը շնորհավորել է հայ ժողովրդին Անկախության տոնի կապակցությամբ՝ միաժամանակ նշելով, որ հայ և վրացի ժողովուրդների մոտ անկախության գաղափարն առանձնահատուկ նշանակություն ունի։

Դեսպան Սադոյանն էլ, իր հերթին, Գեորգի Գախարիային շնորհավորել է վարչապետի պաշտոնը ստանձնելու կապակցությամբ՝ հույս հայտնելով, որ նրա պաշտոնավարման ընթացքում հայ-վրացական հարաբերություններն ավելի կխորանան։

Վրաստանի վարչապետն ու Հայաստանի դեսպանը քննարկել են հայ-վրացական քաղաքական օրակարգի մի շարք հարցեր, ինչպես նաև անդրադարձել են երկկողմ հետաքրքրություն ներկայացնող թեմաների։

Վրաստանի հարցերով փորձագետ Ջոնի Մելիքյանն «Առաջին լրատվական»-ի հետ զրույցում կարևորելով հանդիպման փաստը՝ ընդգծել է. «Հատկապես այս փուլում, երբ Վրաստանում մի կողմից՝ ներքին իրավիճակը ոչ այնքան կայուն է, մյուս կողմից՝ կառավարության ղեկավարն այդ կարգավիճակում նոր է սկսում հանդիպումները տարբեր երկրների ներկայացուցիչների հետ։ Պետք է փաստենք, որ մեր դեսպանն առաջիններից է, ում հետ Գախարիան հանդիպեց։ Թիմը նոր է ձևավորվում, իրենք անելիքներ շատ ունեն, ուստի այս փուլում կոնտակտներ հաստատելը շատ կարևոր է։ Թեպետ մեր պարագայում պետք է նշենք, որ կոնտակտ վաղուց կար, երբ Գախարիան դեռ ներքին գործերի նախարար էր՝ թե՛ դեսպանատան, թե՛ Հայաստանի հետ կապ կար։ Նա մի քանի անգամ Հայաստան է ժամանել, ու կարծում եմ՝ կշարունակվեն արդեն իսկ առկա բարիդրացիական, գործընկերային հարաբերությունները»։

Ըստ մեր զրուցակցի՝ հայ-վրացական հարաբերություններին պետք է նոր լիցք հաղորդել. «Սպասելիքները դրական են։ Ըստ իս՝ Գախարիայի վարչապետության ժամանակ մենք կարող ենք միջպետական հարաբերություններն ակտիվացնել։ Ֆիքսենք առևտրային հարաբերությունները։ Ի վերջո՝ վրացական վիճակագրությունը ցույց է տալիս, որ վերջին շրջանում իրենք կարողացել են անցած տարվա հետ համեմատած ավելացնել իրենց արտահանումը երեք հիմնական շուկաներ՝ ռուսական, ադրբեջանական, հայկական։ Սա ցույց է տալիս, որ մեր երկու պետությունների միջև առևտուրը ավելանում է։ Այլ ոլորտների հետ կապված էլ կան նախանշված ծրագրեր, որոնք կսկսեն պարբերաբար իրականացվել, և արդեն պաշտոնական ու ոչ պաշտոնական այցելությունների ժամանակ դրանք կհստակեցվեն»։

Մեր այն դիտարկմանը, որ Գախարիան Ռուսաստանի հետ հարաբերությունների հարցում ավելի զուսպ մոտեցում ունի, և հարցին՝ արդյոք դա կօգնի՞ նաև հայ-վրացական հարաբերություններին, Մելիքյանը պատասխանել է. «Եթե մենք ավելի լայն ենք դիտարկում, ասենք, Գախարիայի ընտրվելն ու տարածաշրջանում որոշ փոփոխությունները, ես դրական եմ գնահատում։ Մոսկվայից արդեն մեսիջ կա, որ այս նոր կառավարության հետ, որն ավելի զուսպ է, ռիսկերը գնահատող, ավելի պրագմատիկ, որոշ հարցեր կարելի է լուծել։ Օրերս Լավրովը ծավալուն հարցազրույց է տվել, որում անդրադարձ կա նաև ռուս-վրացական հարաբերություններին, նույնիսկ Լավրովը հարց է բարձրացնում, որ չվերթները վերականգնվեն, նույնիսկ վիզային ռեժիմի մասին խոսք կար։ Սա ցույց է տալիս, որ Մոսկվայում այս նոր կառավարությանն այնքան խիստ չեն վերաբերվում, և այս պրագմատիկ մոտեցումներ ունեցող կառավարությունը կարող է տարբեր հարթակներում բարձրացնել Ռուսաստանի հետ կապված տարածքային խնդիրները, բայց մյուս կողմից՝ այնքան խորամանկ պետք է լինի, որ տնտեսական դիվիդենդներ քաղի։

Առավել մանրամասն՝ սկզբնաղբյուր հոդվածում: