Պաշտոնական Երևանը պարտավոր է Ստեփանակերտի հետ նորմալ հարաբերություն ունենալ. Դավիթ Բաբայան

Ինչպես արդեն ասել էինք, այսօր իշխանական ողջ վերնախավը կենտրոնացած է եղել Գյումրիում: Լրագրողներն էլ ժամանակ չեն կորցրել և հարցեր են տվել երկրում տիրող իրավիճակների շուրջ գրեթե բոլոր պաշտոնյաներին:

Արցախի նախագահի մամուլի խոսնակ Դավիթ Բաբայանը՝ անդրադառնալով Հայաստանի և Արցախի միջև եղած անհամաձայնություններին, որոնց մասին բարձրաձայնեց նաև Արցախի նախագահ Բակո Սահակյանը, ասել է, որ անհանաձայնությունը չի նշանակում թշնամանք, անհամաձայնությունը տարբեր կարծիքներ են։

«Ցանկացած նորմալ երկրում պիտի լինեն տարբեր կարծիքներ, բայց դա չի նշանակում, որ մենք պետք է լինենք թշնամի, մենք իրավունք չունենք և որևէ մեկը իրավունք չունի, ով ուզում է լինի, ինչ պաշտոն ուզում է զբաղեցնի, սա իրենց քմահաճույքը չէ։

Ղարաբաղում այսպիսի ասացվածք կա՝ «ապորդ տունը չի», այսինքն հոր տունը չի սա։ Բոլորը պետք է այնպես անեն, որ միասնականություն լինի։ Պաշտոնական Երևանը պարտավոր է պաշտոնական Ստեփանակերտի հետ նորմալ հարաբերություն ունենալ։ Նույնը պաշտոնական Ստեփանակերտը պարտավոր է պաշտոնական Երևանի հետ ունենալ նորմալ հարաբերություններ։ Սկզբունքային անհամաձայնություն Արցախի ապագայի վերաբերյալ չկա»,-ընդգծեց Դավիթ Բաբայանը:

Հակամարտության կարգավորման հարցում Հայաստանի և Արցախի տեսակետները համընկնում են: «Մենք կարծում ենք, որ հակամարտության լուծումը պետք է այնպես լինի, որ նախեւառաջ մեր անվտանգությունը ապահովվի, երկրորդը՝ որեւէ մեկի մոտ գայթակղություն չլինի նորից վերանայել այդ լուծումը եւ լինի երկարատեւ, միգուցե՝ հավիտենական։ Մինչեւ դա չլինի, որեւէ տարբերակ ընդունելի չի լինի»,-ասաց Բաբայանը:

Նա ողջունելի համարեց, որ ՀՀ իշխանությունները ջանքեր են գործադրում Արցախին բանակցային սեղան վերադարձնելու ուղղությամբ. «Մենք ի սկզբանե ողջունել ենք, բայց նշել ենք, որ սա շատ բարդ, երկար, ժամանակատար եւ աշխատատար գործընթաց է, եւ Ադրբեջանն ամեն ինչ անում է, որ խոչընդոտի»:

Ինչ վերաբերում է ՀՀ իշխանությունների պնդմանը, որ Արցախը բանակցային սեղանից դուրս է եկել նախկին իշխանությունների օրոք, Դավիթ Բաբայանը նկատեց. «Արցախը բանակցային գործընթացից դուրս է եկել Ալիեւի քաղաքականության, Ադրբեջանի քաղաքականության հետեւանքով: Եթե Ադրբեջանը չի ուզում մեզ հետ բանակցել, դա իր որոշում է, բայց առանց դրա չի լինելու հակամարտության կարգավորում»: