Ջերմուկի, Գնդեվազի և Կեչուտի բնակիչները իրենց ակցիայով ցանկանում են կառավարությանը մեսիջ տալ. Ամուլսարի պաշտպան (Տեսանյութ)
Ջերմուկի, Գնդեվազի և Կեչուտի բնակիչները իրենց ակցիայով ցանկանում են կառավարությանը մեսիջ տալ։ Այս մասին այսօր՝ սեպտեմբերի 20-ին, Ջերմուկում ասաց Ամուլսարի պաշտպան, ակտիվիստ Շիրակ Բունիաթյանը։
«Շուրջ 1.5 տարի է, որ այս պրոցեսները խաղաղ ձեւով գնում են, ու կարծես մեր կառավարության մոտ թյուրըմբռնում կա, այդ հանգիստ վիճակը չարաշահվում է, հիմա մարդիկ իրենց ընտանիքներով դուրս են եկել, ցանկանում են կառավարությանը մեսիջ տալ, որ մենք այսօր քայլում ենք մինչեւ Ազատամարտիկների հուշարձան, բայց եթե փորձեն Ամուլսարում հանք շահագործեն, այս մարդիկ գնալու ենք, կանգնենք այնտեղ»,–ասաց նա։
Ամուլսարի պաշտպանը շեշտեց՝ այս ակցիաները քաղաքական բնույթ չեն կրում, կառավարության դեմ ուղղված չեն. «Մարդիկ ունեն հստակ պահանջ, որի կատարումից հետո այլեւս փողոց դուրս չեն գա։ Մենք Ամուլսարի հարցը լուծել ենք, մնում է, որ կառավարությունը լեգիտիմացնի։
Կառավարություն-ժողովուրդ երկխոսությունը չդադարի։ Օրինակ այստեղ պետք է լիներ մարզպետը եւ կառավարության կողմից ինչ–որ բան ասեր կառավարության անունից»։
Հիշեցնենք, քիչ առաջ Operativ լրատվականը հաղորդեց, որ Ջերմուկում և Գնդևազում դասադուլ է. բողոքի ակցիաներ Ամուլսարի հանքի շահագործման դեմ :
Գնդեվազցի դպրոցականները նշում էին՝ չեն դադարեցնելու դասադուլը մինչև Ամուլսարի հարցը չլուծվի :
Ջերմուկից, Գնդեվազից և Կեչուտից Ամուլսարի շահագործման դեմ հանդես եկող քաղաքացիները երթ սկսեցին:
Հիշեցնենք նաև, այսօր Operativ լրատվականը իր Մամուլ բաժնում հաղորդել էր, թե «Ժողովուրդ» թերթի փոխանցմամբ՝ Ժողովրդի կարծիքը ոչ ոքի չի հետաքրքրում. Փաշինյանը հայտարարել է` և՛ Ստամբուլյան կոնվենցիան է վավերացվելու, և՛ Ամուլսարի հանքն է շահագործվելու: