Հրայր Թովմասյանի լիազորությունների դադարեցման գործընթացը կատարվում է Հայաստանի Ազգային ժողովի իրավասությունների շրջանակում, իսկ Վանեցյանի հրաժարականը պատահականություն էր
«Իմ քայլը» կառավարող դաշինքի նախաձեռնած՝ Սահմանադրական դատարանի նախագահ Հրայր Թովմասյանի լիազորությունների դադարեցման գործընթացը կատարվում է Հայաստանի Ազգային ժողովի իրավասությունների շրջանակում։ Այս մասին ՀՀ ԱԺ-ում սեպտեմբերի 17-ին, ավանդական ճեպազրույցների ժամանակ ասել է «Իմ քայլը» կուսակցության պատգամավոր Սուրեն Գրիգորյանը։
Ազգային ժողովի կողմից նման գործընթացի նախաձեռնումը, նրա խոսքով, ինքնին չի կարող դիտարկվել որպես ճնշում, քանի որ այդ իշխանությունը խորհդարանի վրա դրված է Սահմանադրությամբ։
«Եթե մարդիկ պնդում են, որ Ազգային ժողովի վրա Սահմանադրությամբ դրված լիազորությունների կատարումն ինքնին դիտարկվում է որպես ճնշում դատական համակարգի վրա, ապա ես շատ լուրջ կասկածներ ունեմ այդ անձանց իրավական գիտելիքների վերաբերյալ»,- ընդգծել է Գրիգորյանը։ Նա նշել է, որ երբ այս նախաձեռնությունը մտնի խորհրդարան՝ քննարկման, հասարակությունն ավելին կիմանա դրա բովանդակության մասին։
Ինչ վերաբերում է ԱԺ-ի կողմից ընդդիմադիր «Լուսավոր Հայաստան» խմբակցության ներկայացրած օրենսդրական նախաձեռնության առաջին ընթերցմամբ ընդունվելուց անմիջապես հետո Ազգային անվտանգության ծառայության ղեկավարի պաշտոնից Արթուր Վանեցյանի հեռացմանը, դա «Իմ քայլը» դաշինքի պատգամավոր Սուրեն Գրիգորյանի հավաստմամբ, խմբակցությունը պատահակություն է համարում:
Ընդ որում, Գրգորյանի խոսքով, համընկման կասկածներն արդարացված կլինեին, եթե հաշվի չառնեինք մեկ հանգամանք: ««Լուսավոր Հայաստանը» վաղուց և հետևողականորեն հայտարարում էր, որ ԱԱԾ և ոստիկանության պետերի պաշտոնները պետք է որոշակի քաղաքական բնույթ կրեն: Կար նաև կառավարության շրջանակներում օրինագիծն ընդգրկելու նախաձեռնություն, սակայն մենք այն մերժեցինք»,- հստակեցրեց Գրիգորյանը:
Հիշեցնենք, որ նախօրեին Operativ լրատվականը հաղորդել էր, թե Հայաստանի ԱԱԾ տնօրեն Արթուր Վանեցյանը Facebook-ի միջոցով անսպասելիորեն հայտնել էր իր հրաժարականի մասին: