«Մեծ հավանականությամբ նման բան տեղի չի ունենա». Փաշինյանը՝ ԱԺ արտահերթ ընտրությունների մասին (Տեսանյութ)
«Իմ քայլը» խմբակցությունը ձևավորվել է բոլորիս հայտնի պայմաններում, այն ունի շատ լուրջ աշխատանք կատարելու որպես քաղաքական մեկ ամբողջություն կայանալու համար: Այս մասին, այսօր՝ իր մեծ ասուլիսի ժամանակ նշեց ՀՀ վարչապետ Նիկոլ Փաշինյանը՝ հավելելով, որ իրենք այդ աշխատանքը պետք է կատարեն:
Դիտարկմանը, որ «Իմ քայլը» խմբակցությունում տարբեր հարցերում կարծիքները կիսվել են, հնարավո՞ր է, որ դա հանգեցնի խմբակցության փլուզման, ապա նաև արտահերթ խորհրդարանական ընտրությունների, Փաշինյանը պատասխանեց. «Կհաջողվի՞ կատարել այդ աշխատանքը՝ լավ, չի հաջողվի կատարել այդ աշխատանքը՝ էլի լավ, ոչ մի ողբերգություն չկա: Եթե «կարողա»-ներով խոսենք, կարող է չհանգեցնել արտահերթ խորհրդարանական ընտրությունների և մեծ հավանականությամբ նման բան տեղի չի ունենա:
Հայաստանը պետք է լինի ժողովրդավարական, իրավական, ինքնիշխան և սոցիալական երկիր: Այս շրջանակներից ներս ինչ էլ տեղի ունենա, դա ողբերգություն չէ: Ոչ միայն ողբերգություն չի, այլ դրանք նորմալ պրոցեսներ են»:
Արդյոք չե՞ք կարծում, որ Ամուլսարի հանքի շահագործման վերաբերյալ փորձաքննության վրա ծախսված 400 հազար դոլարը վատնված է հարցին էլ վարչապետը պատասխանեց հետևյալ կերպ.
«Էդ 400 հազար դոլարը ծախսվել է Ամուլսարի հանքի շահագործման վերաբերյալ ճշմարտությունն ի հայտ բերելու համար և ես չեմ կարծում, որ հանուն ճշմարտության ծախսված որեւէ գումար կարելի է համարել վատնված:
Արձանագրենք մի բան, որ սկսված առաջին օրվանից Կառավարությունը Ամուլսարի հանքի շուրջ ստեղծված իրավիճակում 100 տոկոսանոց թափանցիկ է աշխատում, այսինքն ընդհուպ մեր աշխատանքային խորհրդակցությունների արդյունքները հրապարակված են հանրության համար: «Էլարդի» հետ սկայպ կոնֆերանսի ընթացքում նաեւ այլ հանգամանքներ պարզվեցին: Պարզվեց, որ էդտեղ կա որոշակի բանավեճ, եւ նաեւ «Էլարդի» եզրակացությունը եւ ասածն այն էր, երբ որ ես իրենց հարց տվեցի եւ ասացի, թե ձեր առաջարկած պայմաններում երաշխավորում եք անվտանգությունը եւ այլն, իրենք ասացին, որ բոլոր դեպքերում անվտանգության երաշխավորը «Լիդիան» ընկերությունն է, եւ իրենք ասացին, որ պետք է շինարարությունը սկսվի եւ մնացած հարցերը մենք կարողանանք հընթացս կարգավորել»,- ասաց վարչապետը:
Նա նշեց, որ փորձագետները տեսակապի միջոցով որոշ տվյալներ սխալ են ներկայացրել:
«Հիշում եք` որ էնտեղ գնաց խոսակցություն կավարտի ջրերի պասիվ մաքրելու կայանով մաքրելու վերաբերյալ, երբ որ «Էլարդի» ներկայացուցիչն ասում էր, որ դրանք ընդամենը մի տարրի մասով են ստուգվել, իրականում սակայն քրեական գործի նյութերում առկա է, որ դրանք 90 տարրի մաքրման միջոցով են ստուգվել: Հիմա էդտեղ ինչու է «Էլարդի» ներկայացուցիչը ասել, ես քննչական կոմիտեի նախագահին հարց տվեցի, երբ որ մենք քննարկում էինք, բա ինչու հենց տեղում հարց չտվեցիք, ինքն ասեց, որ ես ձայն խնդրեցի, բայց էնպես ստացվեց, որ ինձ ձայն չտվեցիք»,- ասաց Փաշինյանը: