Ղազանչի գյուղում գրեթե 1 շաբաթ է՝ բնակիչները ջրից թունավորվում են. Ջրագծերը հին են եւ մաշված

Շիրակի մարզի Աշոցք համայնքի Ղազանչի գյուղում գրեթե մեկ շաբաթ է՝ անընդհատ թունավորման դեպքեր են գրանցվում. Բնակիչները վստահ են՝ պատճառը խմելու ջուրն է։ NEWS.am-ի հետ զրույցում գյուղի վարչական ղեկավար Լուսինե Սիմոնյանը նշել է, որ համայնքում խմելու ջրի խնդիրը երկար տարիների պատմություն ունի։

«Մեր համագյուղացիները բողոքում են, որ թուլություն են զգում, փորլուծություն, սրտխառնոց, մի քանիսը դիմել են հիվանդանոց։ Նրանք շեշտում էին, որ ջրից է եղել թունավորումը, որովհետև այդ պահին շատ ջուր են օգտագործել, նաև նշում են, որ ջուրը կեղտոտ է եղել, հետը որդեր են եղել։

«Մենք ահազանգել ենք «Վեոլիա ջուր» ընկերությանը։ Ուրբաթ առավոտյան եկել են, ջրի նմուշ են տարել»,–նշել է նա։

Լուսինե Սիմոնյանի խոսքով՝ ջրագիծը հին է և մաշված. «Անձրևների ժամանակ անձրևաջուրը ներծծվում է խմելու ջրի հետ, տեղ կա, որ կոյուղու ջուրն է խառնվում խմելու ջրին»։

Նա պատմել է, որ անձրևների ժամանակ դեղին ջուր են խմում համայնքի բնակիչները, քանի որ երբ քայքայված ջրի խողովակներում ճնշումն ընկնում է ու սկսվում է ջրի հետհոսք, կեղտաջրերն ու անձրևաջրերը ներծծվում են ջրագծերի մեջ։

Համայնքում, համայնքի վարչական ղեկավարի փոխանցմամբ, անընդհատ ջրագծի վթարներ են գրանցվում. «Գալիս են ծակված խողովակների մեջ փայտից սեպ են խրում ու գնում։ Անընդհատ այս խնդրի առաջ ենք կանգնած»։

Լուսինե Սիմոնյանը նշել է նաև, որ թունավորման առաջին դեպքերը գրանցվել են սեպտեմբերի 9-ից սկսած։ Նրա խոսքով՝ նաև մանկապարտեզի երեխաներն են սկսել գանգատվել փորացավից ու թուլությունից և մանկապարտեզից էլ են ջրի նմուշ վերցրել։

Համայնքի ղեկավարը խնդրի մասին տեղյակ է պահել պատկան մարմիններին։