Ջրային կոմիտեի հայտարարությունը՝ Սևանից ջրառի վերաբերյալ թյուր ինֆորմացիայի տարածման վերաբերյալ

Ջրային կոմիտեն հայտնում է, որ երեկ՝ սեպտեմբերի 2-ին որոշ լրատվամիջոցներով Սևանի մակարդակին առնչվող թյուր մեկնաբանություն է շրջանառվել և թյուրիմացությունից ու սխալ մեկնաբանություններից զերծ մնալու համար ներկայացնում է պարզաբանում:

«Որոշ լրատվամիջոցներով այսօր Սեւանի մակարդակին առնչվող թյուր մեկնաբանություն է շրջանառվել, որն իրականությունից հեռու է։ Թյուրիմացությունից, սխալ մեկնաբանություններից զերծ մնալու համար Ջրային կոմիտեն ներկայացնում է իրականությունն ու պարզաբանում:

Այս տարվա սեպտեմբերի 1-ի դրությամբ Սեւանի մակարդակը 1900.63մ է, նույն ցուցանիշն է 2018թ. նույն օրվա դրությամբ։

Արփա-Սեւան ջրատարով լիճ մուտք գործած ջրի ծավալը այս տարվա սեպտեմբերի մեկի դրությամբ կազմել է 148. 343մլն խ/մ, իսկ անցյալ տարվա նույն ցուցանիշը 131.538մլն խ/մ էր, տարբերությունը կազմում է 16.805մլն խ/մ ջուր։

Ինչ վերաբերում է լճից ջրառին, ապա նույն օրվա դրությամբ այս տարի Սեւանից բաց է թողնվել 129․044մլն խ/մ ջուր, իսկ անցյալ տարի այդ ցուցանիշը 174.956մլն խ/մ էր։

Ուշադրություն ենք հրավիրում թվերի տարբերությանը, փաստորեն, այս տարի Արփա-Սեւան ջրատարով լիճ մուտք գործած ջրի ծավալը / ներառյալ ստորերկրյա ներհոսքը/ նախորդ տարվանից ավելի է 16․805 մլն խ/մ-ով։

Ջրառի դեպքում ակնհայտ է, որ նույն՝ սեպտեմբերի 1-ի դրությամբ, Սեւանից այս տարի պակաս է վերցվել 45,912մլն խ/մ ջուր։ Հիշենք, որ անցյալ տարի, օրենքով սահմանված 170 մլն խ/մ ջրառից հետո լրացուցիչ ջրառի կարիք եւս առաջացավ, Սեւանից ոռոգման նպատակով հավելյալ 40 մլն-ի ջրառի թույլտվություն եղավ, ընդհանուր 210 մլն խ/մ թույլատրված ջրառից օգտագործվեց 200․623 մլն խ/մ-ն։

Իսկ այս տարի ոչ միայն լրացուցիչ ջրառի կարիք չկա լճից, այլեւ համակարգում կանխատեսում են եւս 5-10 մլն խ/մ ջրի խնայողություն՝ թույլատրված 170 մլն-ից, եթե եղանակային պայմանները թույլ տան։ Նման խնայողությունն այս տարի հնարավոր է դարձել տարեսկզբից ոռոգման համակարգում իրականացվող կառավարման արդյունավետության քայլերի, իհարկե, նաեւ՝ բարենպաստ եղանակի, ջրամբարներում ավելի շատ ջուր կուտակելու շնորհիվ։

Իրականությունը սա է եւ ՀՀ վարչապետ Նիկոլ Փաշինյանի հայտարարությունը՝ 2019թ-ին Սեւանից 51 մլն խ/մ-ով պակաս ջրառի մասին, հենց այս իրականությունն է արտացոլում, թվերը, բնականաբար, ըստ օրերի փոփոխվում են եւ ոռոգման շրջանի ավարտին հանրությանը կներկայացվի վերջնական պատկերը։

Ինչ վերաբերում է լճի մակարդակի եւ ջրառի խնայողության զուգահեռներին, ապա դրանք միայն բացարձակ թվերով համադրելի չեն, քանի որ լճի մակարդակը պայմանավորված չէ միայն ջրի ներհոսքով կամ արտահոսքով, կա գոլորշացման բնական երեւույթը, կան նաեւ ստորերկրյա արտահոսքերը, եղանակային պայմանները եւ այլն, որոնց մանրամասն բացատրությունը կարող են տալ համապատասխան մասնագետները։

Լճի մակարդակի վերաբերյալ եւս տվյալները փոփոխվում են եւ եթե որոշ լրատվամիջոցների մտահոգությունը հարուցած՝ 1սմ-ի տարբերություն էր գրանցվել օգոստոսի 29-ին, ապա սեպտեմբերի 1-ի դրությամբ, ինչպես արդեն ներկայացրել ենք, ցուցանիշը նույնն է, ինչ՝ անցյալ տարվանը։

Ի դեպ, հիշեցնենք նաեւ, որ Սեւանի հետ կապված՝ ներկայացված բոլոր թվերը ԱԻՆ Հիդրոմետ ծառայության չափումների տվյալներն են, որոնք պարբերաբար հրապարակվում են»: