Ղրղզստանում կալանք է դրվել Ատամբաևի կառուցած մզկիթի վրա

Բիշքեկի Պերվոմայսկի շրջանային դատարանը կալանք է դրել Ղրղզստանի նախկին նախագահ Ալմազբեկ Ատամբաևի կառուցած մզկիթի վրա, ՌԻԱ «Նովոստի»-ին տեղեկացրել են հանրապետության գլխավոր դատախազության մամուլի ծառայությունում։

Ինչպես ճշտել են վերահսկող մարմնում, նախկին նախագահի դեմ հարուցված քրեական գործերի հետաքննության շրջանակում զինվորական դատախազությունը պարզել է, որ «Ապրիլի 7-ի հերոսների» մզկիթը կառուցվել է Ատամբաևի կողմից։ Իսկ տեղամասը, որտեղ գտնվում է այն, գրանցված է «Ֆորում» գիտաարտադրական ընկերության անունով, որը փաստորեն պատկանում է Ատամբաևին։

«Պերվոմայսկի շրջանային դատարանի վճռով վերոնշյալ գույքի վրա կալանք է դրվել»,- ասել են մամուլի ծառայությունում։

Գլխավոր դատախազության տվյալներով՝ ներկայում քննությունը փորձում է պարզել դրամական միջոցների աղբյուրը, որոնցով պետության նախկին ղեկավարը կառուցել է մզկիթը։

Ղրղզստանի հատուկ ծառայություններն օգոստոսի 7-8-ին իրականացրին Ատամբաևին մայրաքաղաքից 20 կիլոմետր հեռու գտնվող Քոյ-Թաշ գյուղում գտնվող նրա տանը կալանավորելու գործողություն։ Նրանք նախկին նախագահի կողմնակիցների դեմ կիրառեցին հատուկ միջոցներ։ Ատամբաևի կողմնակիցները պատասխան կրակ բացեցին։ Առաջին օրը նախկին նախագահին բռնել չհաջողվեց։ Ատամբաևի կողմնակիցները գերի վերցրին վեց հատուկջոկատայինի։ Հաջորդ օրը նախկին նախագահի կողմնակիցների և ուժայինների բախումները վերսկսվեցին և շարունակվեցին մինչև առավոտ, չնայած այն բանին, որ նախկին նախագահը հանձնվել էր ուժայիններին։ Հատուկ գործողության ժամանակ, առողջապահության նախարարության տվյալներով, տուժեց 136 մարդ։ Մեկ հատուկջոկատային՝ Ուսեն Նիյազբեկովը, զոհվեց։

Ղրղզստանի խորհրդարանական ամենամեծ կուսակցության՝ սոցիալ-դեմոկրատների առաջնորդ Ատամբաևը իշխանությունն իր հաջորդին և մերձավոր զինակցին՝ Սոորոնբայ Ժեենբեկովին է հանձնել 2017-ին նախագահական ընտրությունների արդյունքներով։ Սակայն շուտով նախկին նախագահի թիմի անդամների դեմ քրեական գործեր են հարուցվել։

Ինքը՝ Ատամբաևը, զրկվել է նախկին նախագահի կարգավիճակից և մեղադրվել ծանր և առանձնապես ծանր հանցագործությունների մեջ։ Պետության նախկին ղեկավարը բազմիցս հայտարարել է, որ բոլոր մեղադրանքներն իր և իր կողմնակիցների հասցեին քաղաքական բնույթ են կրում։