Արցախում նշել են նախկին Ղուբաթլուի ազատագրման 26-ամյակը

Արցախի Հանրապետության Քաշաթաղի շրջանի Որոտան համայնքում օգոստոսի 31-ին տոնել են քաղաքի (նախկինում՝ Ղուբաթլու) ազատագրման 26-րդ տարեդարձը։ 

Տոնական միջոցառմանը մասնակցել են Քաշաթաղի շրջանի վարչակազմի ղեկավարի տեղակալ Հովհաննես Սահակյանը, Որոտան համայնքի ղեկավար Վրույր Ասրյանը, Որոտանում տեղակայված N զորամասի սպայակազմը, շրջակա համայնքների ղեկավարները, ինչպես նաև բնակիչներ և հյուրեր։

Միջոցառման սկզբում ներկաները ծաղիկներ են խոնարհել խաչքար-հուշարձանի մոտ։

Վարչակազմի ղեկավարի տեղակալ Հ․ Սահակյանը շնորհավորական խոսքում վարչակազմի և վարչակազմի ղեկավար Ստեփան Սարգսյանի անունից շնորհավորել և շնորհակալություն է հայտնել բոլոր նրանց՝ ողջ թե նահատակ, որ ազատագրել են Որոտանը, որ բնակեցրել են Որոտանը և որ շարունակում են պաշտպանել ու շենացնել այն։

Շնորհավորանքի խոսք է ասել նաև Որոտանում տեղակայված N զորամասի հրամանատարի տեղակալ մայոր Էդգար Մաթևոսյանը․ «Այս ամենը ձեռք է բերվել շատ թանկ գնով՝ ազատամարտիկների կյանքի, առողջության և հարազատների բարօրության հաշվին»,- հիշեցրել է մայոր Է․ Մաթևոսյանը։

Շնորհավորական ելույթներից հետո մի շարք ներկաների հանձնվել են պետական և գերատեսչական պատվոգրեր Քաշաթաղի շրջանի վարչակազմի ղեկավարի, Որոտան համայնքի ղեկավարի և ՀՀ ԶՈՒ 1-ին ԶՄ հրամանատար Ժիրայր Պողոսյանի անունից։

Բացման ելույթներին հաջորդել են այս տարի առաջին դասարան գնացող որոտանցի երեխաների յուրատեսակ մուտքը դեպի տոնական շարահրապարակ, ապա զորամասի հետախուզական դասակի ցուցադրական ելույթները։ Հընթացս ներկաները հնարավորություն են ունեցել նաև դիտել շարահրապարակում ցուցադրված զինատեսակները՝ ծանոթանալով դրանց մարտավարատեխնիկական բնութագրերին։

Միջոցառման հանդիսավոր մասի ավարտից հետո համերգային կատարումներով ներկաներին ուրախացրել են «Բերձոր» ժողովրդական գործիքների համույթը և Բերձորի արվեստի դպրոցի Կովսական քաղաքի «Թաթուլ» պարի խումբը։

Այնուհետև շրջվարչակազմի ղեկավարի տեղակալը և համայնքի ղեկավարը մասնակցել են ՀՀ ՊՆ 1-ին ԲԿ հրամանատարի գույքային օժանդակությամբ Որոտանում ստեղծված մասնավոր ատամնաբուժարանի բացմանը, ատամնաբույժ Քնարիկ Մարտիրոսյանի ուղեկցությամբ ծանոթացել ստեղծված պայմաններին։ Ք․ Մարտիրոսյանը հավաստիացրել է, որ տնտեսվարական գործունեության հետ միաժամանակ պահպանելու է բուժհաստատության սոցիալական նշանակությունը՝ որպես վկայություն բերելով այն, որ մի շարք ծառայություններ ժամկետային զինծառայողների համար լինելու են անվճար։

Հայկազյան համայնքում տեղի է ունեցել կառավարության կողմից կառուցված դպրոցի բացումը

Որոտանից տոնական թափորի մասնակիցներն ուղևորվել են դեպի Քաշաթաղի շրջանի Հայկազյան համայնք, որտեղ կատարվել է կառավարության կողմից կառուցված դպրոցի բացման արարողությունը։ Ներկաները շրջայց են կատարել դպրոցի շենքում, ծանոթացել ստեղծված պայմաններին և բարի ուսումնառություն մաղթել աշակերտներին։ «Մեր լրատվամիջոցների աշխատանքի շնորհիվ թշնամին վաղը կտեսնի, որ Ղուբաթլու-Որոտանի ազատագրման օրը մենք շրջանում նաև դպրոց ենք բացում»,- ասել է շրջվարչակազմի ղեկավարի տեղակալ Հ․ Սահակյանը։ Հայկազյանի դպրոցի շահառուներն են լինելու ինչպես տվյալ համայնքի երեխաները, այնպես էլ Որոտանի սաները։