Սա նոր Հայաստանի ժողովրդավարության համար փորձաքար է. Սերգեյ Բագրատյանը՝ Ամուլսարի մասին
Որպեսզի Ամուլսարի հարցում վերջնական գնահատական ունենանք, պետք է նոր ՇՄԱԳ/ԲՍԱԳ իրականացվի եւ հանրային կոնսենսուսով հարցին լուծում տրվի։ Այս մասին NEWS.am-ի հետ զրույցում ասաց ՀՀ ԱԺ «Բարգավաճ Հայաստան» խմբակցության պատգամավոր Սերգեյ Բագրատյանը` հավելելով, որ հանրության հավաքական կարծիքը հասկանալու համար հանրաքվե պետք է անցկացվի։
«Դեռ նախորդ իշխանության օրոք ուսումնասիրելով բոլոր փաստաթղթերը՝ եկել ենք այն եզրահանգման, որ ռիսկեր կան։ Նման բարձր ռիսկերի պայմաններում համամիտ ենք եղել ժողովրդի հետ, որ այս ձեւով չի կարելի շահագործել հանքը։ Հիմա երբ լրացուցիչ ուսումնասիրության է ուղարկվել «Էլարդ», եւ «Էլարդը» եզրակացություն էր տվել, որ ռիսկերը կառավարելի են, ինձ համար անհասկանալի է, թե ոնց կարելի է այդ ռիսկերը կառավարել»,–նշեց նա։
Պատգամավորի խոսքով, սակայն, «Էլարդի» փորձագետների հետ տեսակոնֆերանսը ապացուցեց, որ իսկապես հնարավոր չէ առկա ռիսկերը կառավարել. ««Էլարդ»-ի փորձագետները հիմնականում ստանդարտ լուծումներ էին տվել ոսկու հանքերի շահագործման համար, այսինքն՝ նույնիսկ այդ եզրակացության մեջ ռիսկերի կառավարելիության մասին խոսակցությունը տեղին չէր, քանի որ նպատակը այն չէր, թե ինչ լրացուցիչ միջոցառումներ պետք է իրականացվեն, նպատակը պարզելն էր, թե այս ՇՄԱԳ–ով հնարավո՞ր է շահագործել Ամուլսարն առանց վտանգավոր հետեւանքների։ Այս մասով «Էլարդը» հստակ պատասխանեց, որ կառավարելի չէ այս ծրագրով Ամուլսարը շահագործել եւ բարձր ռիսկեր չունենալ»։
«Լիդիան» ընկերության հայտարարության առնչությամբ, թե ՀՀ կառավարությունը պետք է բացահայտի այն մրցակից հանքարդյունաբերական ընկերություններին, որոնք վճարում են «Լիդիանի» դեմ ակցիաները, պատգամավորը նկատեց. «Նախկինում կասկածներն ուղղված էին «Լիդիանի» ուղղությամբ, կային կասկածներ, որ կոռուպցիոն ռիսկերի արդյունքում են թույլտվություններ ստացվել, հիմա «Լիդիանն» է նման պնդումներ անում։ Ես չեմ կարող բացառել որեւէ կոռուպցիոն ռիսկ, այս իմաստով չեմ կարող մեղադրել նաեւ տեղացիներին, նրանք իրենց բնօրրանում անվտանգ ապրելու իրավունքն են պաշտպանում, սակայն, իհարկե, կլինեն մարդիկ, որոնք կփորձեն դիվիդենտներ շահել»։
Սերգեյ Բագրատյանը կարծում է՝ չպետք է վախենալ միջազգային արբիտրաժից. «Եթե մենք հիմնավոր ապացույցներով հանդես գանք եւ մեր օրենսդրությամբ հիմնավորենք, որ սխալներ կան, ռիսկերը բարձր են, որեւէ արբիտրաժ չի կարող դա հաշվի չառնել։ Սա նոր Հայաստանի ժողովրդավարության համար փորձաքար է եւ պետք է բոլոր մասնակիցները իրենց տեսակետները, ուսումնասիրությունները, կարծիքները կարողանան համադրել, եւ փորձեն հասկանալ իրական վիճակը, եթե սա անում ենք, միջազգային հանրությունից որեւէ վտանգ չի սպառնում»։