Հարավային Օսեթիայի սահմանային ծառայությունը սկսել է Ուիստի (Ցնելիս) գյուղի սահմանամերձ արվարձաններում «հումանիտար գործողություններ»

Հարավային Օսեթիայի սահմանային ծառայությունը սկսել է Ուիստի (Ցնելիս) գյուղի սահմանամերձ արվարձաններում «հումանիտար գործողություններ», քանի որ այդտեղ լարվել էր իրավիճակը Վրաստանի կողմից ոստիկանության անցակետ տեղադրելուց հետո, ուրբաթ հայտնել է հանրապետության պետական անվտանգության հանձնաժողովը: Գործողությունների բնույթը չի պարզաբանվում:

«Հարավօսեթինական եւ վրացական սահմանին՝ Զնաուրիի շրջանում, վրացական կողմի սադրիչ գործողությունների կապակցությամբ գերագույն հրամանատար Անատոլի Բիբիլովի որոշմամբ ԱԱԾ-ի սահմանամերձ ծառայության ուժերն ու ստորաբաժանումները սկսել են իրականացնել հումանիտար գործողություններ օսեթական Ուիստ (Ցնելիս) գյուղի արվարձաններում: Հումանիտար գործողությունները կրում են բացառապես խաղաղ բնույթ»,-ասվում է հաղորդագրության մեջ:

Դրանում ընդգծվում է, որ ԱԱԾ-ի սահմանամերձ ծառայության գործողություններն ուղղված են սահմանամերձ ռեժիմի ապահովմանը, հանրապետության քաղաքացիների անվտանգության ապահովմանն ու տարածաշրջանում ռազմաքաղաքական իրավիճակի կայունացմանը, հաղորդում է ՏԱՍՍ-ը:

Խաշուրի շրջանի Չորչան գյուղի մերձակայքում ոստիկանական անցակետը կպահպանվի

Խաշուրի շրջանի Չորչան գյուղի մերձակայքում ոստիկանական անցակետը կպահպանվի՝ չնայած Ցխինվալին պահանջում է դրա ապամոնտաժումը: Այդ մասին հայտարարել է Վրատանի Անվտանգության խորհրդի ղեկավար Կախա Քեմոկլաձեն Միջադեպերի կանխարգելման և դրանց արձագանքելու մեխանիզմների շուրջ խմբի տեխնիկական հանդիպումից հետո, հաղորդում է Նովորստի-Գրուզիա-ն:

Այսօր արտահերթ հանդիպում է տեղի ունեցել Չորչանում, որին բացի Վրաստանի կենտրոնական իշխանության ներկայացուցիչներից եւ Ցխինվալիի կառավարությունից, մասնակցել են նաեւ Եվրամիության դիտորդական առաքելության եւ ԵԱՀԿ-ի աշխատակիցները:

Քեմոկլիձեի խոսքով՝ հանդիպումը կառուցողական էր եւ կողմերը պայմանավորվել են ապաէսկալացիայի համար անհրաժեշտ միջոցներ ձեռնարկելու մասին: Ոստիկանական անցակետն ապամոնտաժելու մասին խոսք չի եղել:

«Ոստիկանության անցակետի մասին կենտրոնական եւ փաստացի իշխանություններն ունեն լիովին տարբեր դիրքորոշում, սակայն, չնայած այդ տարաձայնությանը, մենք խնդիր չենք տեսնում նրանում, որ շարունակենք համագործակցությունը կառուցողական ուղղությամբ»,-հայտարարել է Վրաստանի Անվտանգության խորհրդի ղեկավարը:

«Բոլոր մեր փորձերը կուղղվեն լարվածության թուլացմանը եւ հետագայում կձեռնարկվեն միջոցներ, որ հնարավոր բարդացումները հանգուցալուծվեն երկխոսության ճանապարհով»,- լրագրողներին ասել է Վրաստանի ԱԱԾ-ի տեղեկատվական-վերլուծական բաժնի ղեկավարի տեղակալ Իրակլի Անթաձեն:

Թբիլիսիից հանդիպման մեկ այլ մասնակից՝ Վրաստանի Ներքին գործերի նախարարի տեղակալ Վլադիմիր Բորցվաձեն նշել է, որ Ցխինվալիի իշխանությունները հաստատել են իրենց պատրաստակամությունը կառուցողական երկխոսությունը շարունակելու հարցում:

«Այսօրվա հանդիպման ժամանակ բազմաթիվ հարցեր են քննարկվել: Առաջինն ու գլխավորն այն է, որ, ինչպես հայտարարել են օկուպացիոն ուժերի ներկայացուցիչները, նրանք չեն պատրաստվում խոսել մեզ հետ ուլտիմատումի լեզվով: Նրանք պարզաբանել են, որ դա լրագորղների կողմից սխալ մեկնաբանման հետեւանք էր: Միանշանակ է, որ անցակետը տեղադրվել է անվտանգությունը պաշտպանելու միակ նպատակով:»,-ասել է Բորցվաձեն:

Բանակցությունների արդյունքում սեփական դիրքորոշումը պահպանելու մասին հայտարարել են նաեւ Ցխինվալիի իշխանությունները: Մասնավորապես, դե ֆակտո նախագահ Անատոլի Բիբիլովը հայտնել է, որ Ցնելիսի գյուղում նրանք պատրաստվում են տեղադրել սեփական սահմանամերձ անցակետը:

«Տեխնիկական հանդիպումն ավարտվել է. ընդհանուր հայտարարի դեռ չենք եկել: Բանակցությունները կշարունակվեն առաջիկա օրերին: Պետական անվտանգության հանձնաժողովին հանձնարարվել է տեղադրել սեփական անցակետը, որպեսզի այդ գյուղում մարդիկ պաշտպանված զգան իրենց»,-ասել է պետության ղեկավարը, հաղորդում են Ցխինվալիի ԶԼՄ-ները: