Կառավարությունն այսօր՝ օգոստոսի 29-ին հրավիրված նիստում մաքսային արտոնություն տվեց «Ջերմուկ գրուպ» ընկերությանը

Կառավարությունն այսօր՝ օգոստոսի 29-ին հրավիրված նիստում մաքսային արտոնություն տվեց «Ջերմուկ գրուպ» ընկերությանը։

Մասնավորապես, բավարարվեց «Ջերմուկ գրուպ» փակ բաժնետիրական ընկերության կողմից ներկայացված հայտը գերակա ոլորտում իրականացվող ներդրումային ծրագրի շրջանակներում ներմուծված (ներմուծվող) տեխնոլոգիական սարքավորումները, դրանց բաղկացուցիչ ու համալրող մասերը, հումքը եւ (կամ) նյութերը ներմուծման մաքսատուրքից ազատելու արտոնությունից օգտվելու համար։

ՀՀ էկոնոմիկայի նախարար Տիգրան Խաչատրյանը որոշման նախագիծը ներկայացնելիս ասաց, որ կազմակերպությունը ներկրվող ապրանքները պետք է օգտագործի պոլիմերային շշեր արտադրելու համար. «Արտադրությունն իրականացվում է Ջերմուկ քաղաքում, այս ծրագրի շրջանակներում նախատեսվում է 20.8 մլրդ դրամ ընդհանուր արժեքով ներդրումներ, որից 804.9 միլիոն դրամը հոսքագծերի ձեռքբերման, 20 մլրդ 68 մլն դրամը հումքի եւ այլ սարքավորումների ձեռքբերման համար։

Կազմակերպությունում աշխատում են 408 աշխատակլիցներ, այս ծրագրի շրջականերում կստեղծվեն եւս 15 աշխատաեղեր 180 հազար դրամ միջին աշխատավարձով։

Ծրագրով նախատեսված արտադրանքի ընդհանուր ծավալը կկազմի 26 մլրդ ՀՀ դրամ, որից 15.6 մլրդ ՀՀ դրամի արտադրանքը կիրացվի ՀՀ տարածքում, 8 մլրդ 320 մլն ՀՀ դրամի արտադրանքը` ԵԱՏՄ այլ անդամ երկրների տարածքում, 2 մլրդ 80 մլն ՀՀ դրամի արտադրանքը` երրորդ երկների տարածքում:

Արտոնություն ստանալու համար ներկայացված ապրանքների արժեքը կազմում է 20,068,242,276 ՀՀ դրամ: Մաքսատուրքի ազատման արտոնությունը կազմում է 804,398,571 ՀՀ դրամ»:

Շրջակա միջավայրի նախարար Էրիկ Գրիգորյանը հետաքրքրվեց, թե «Ջերմուկ գրուպի» կողմից պլաստմասե շշի հումքի ներկրման դեպքում բնապահպանական վճարը արդյոք գանձվում է։

ՀՀ վարչապետ Նիկոլ Փաշինյանը կատակեց. «Փաստորեն «Ջերմուկ» հանքային ջրի արտադրությունն էլ է Ջերմուկի շրջակա միջավայրին վնաս, լիքը վնասակար արտադրություններ կան, մտածենք ինչ անենք, փակենք, չփակենք»։

Տիգրան Խաչատրյանը նշեց, որ բոլոր շշալցնող կազմակերպությունները ներկրում են համապատասխան հումքը եւ եթե օրենքով սահմանված է այդ վճարը, ապա վճարում են, անկախ այս հարցից։

ՊԵԿ նախագահ Դավիթ Անանյանն ասաց, որ մաքսային սահմանին գանձվում է բնապահպանական վճարը։

Ֆինանսների նախարար Ատոմ Ջանջուղազյանն ասաց, որ իրենց ուշադրությունն այդ հարցի վրա է. «Այս նախագծի հետ կապ չունի, հարցը պարոն Գրիգորյանը բարձրաձայնեց, որ մեր ուշադրությունը հրավիրի, մեր ուշադրությունն էլ հրավիրվել է արդեն, մենք կքննարկենք, եթե հարկային օրենսգիրքը միանշանակ չի տալիս հարցի լուծումը, ապա կդարձնենք միանշանակ»։