Խոսում ենք Ամուլսարի հարցում կառավարության սցենարի ու պատասխանատվության մասին. բնապահպաններ (տեսանյութ)

Նիկոլ Փաշինյանի այցը Ջերմուկ ձեւական բնույթ ստացավ, քանի որ փոխանակ հանդիպում լիներ այնտեղ հավաքված ժողովրդի հետ, նրանք սկսեցին մտնել անհատների տներ։ Այս մասին այսօր՝ օգոստոսի 28–ին, Հայկական բնապահպանական ճակատ ֆեյսբուքյան էջի ուղիղ եթերում ասաց բնապահպան Անի Խաչատրյանը։

Իսկ բնապահպան Աննա Շահնազարյանը հիշեց՝ փոխվարչապետ Տիգրան Ավինյանի անցյալ տարվա հայտարարություններից մեկը. «Հենց նույն Տիգրան Ավինյանն առաջին անգամ իր հարցազրույցներից մեկում հիշատակեց մի աբսուրդային թիվ, որն ինքը մտցրեց շրջանառության մեջ, իբրեւ աբրիտրաժի արդյունքում փոխհատուցման ակնկալիք «Լիդիան»–ի կողմից եւ այդ թիվը պտտեցին–պտտեցին ու անամոթաբար, բառիս բուն իմաստով՝ ամենալկտի ձեւով ուզում են ինչ որ կոնկրետ մարդկանց վրա, օրինակ՝ բնապահպանների վրա բարդել պետության կողմից նման աբրիտրաժային փոխհատուցում վճարելու այդ հնարավոր տեսլականը, որը բացարձակապես հիմք չունի, ու որը պարզելու համար պատասխանատուն կրկին անգամ այս պետությունն է»։

Նրանք անդրադարձան նաեւ Թեղուտի հանքի շահագործման խնդրին՝ ասելով, որ այնտեղ առաջացած ֆինանսական կոլապսի մեղավորը ներկայիս Էկոնոմիկայի նախարար Տիգրան Խաչատրյանն է. «Նույն Տիգրան Խաչատրյանը, որ հիմա նախարար է, 10 տարի եղել է Թեղուտի ֆինանսական տնօրենը, եւ ոչ միայն պատասխանատվության չի ենթարկվել առաջացած վիճակի համար, այլ այսօր մեծ–մեծ խոսում է։ Հերիք չէ նախարար են նշանակել, որը խայտառակություն է պետության համար, իրեն թույլ է տալիս խոսել նաեւ Ամուլսարի ծրագրի մասին»։