ՊՆ գնդապետները` աղմկալի միջադեպի կիզակետում
Երեկ Ria.ru կայքը լուր հրապարակեց այն մասին, որ ռուսական ORSIS զինագործական ընկերությունը ՀՀ ՊՆ-ին դատի է տվել մի մրցույթի տապալման համար: Մրցույթը, ըստ հրապարակման, վերաբերվում է փամփուշտների արտադրությանը: Հարցը մամուլում լայն տարածում գտավ և շատ ցավոտ արձագանքներ եղան, ընդհուպ տրվեցին քաղաքական երանգներ: Շատերը սրանում տեսնում են հերթական հայ-ռուսական հակասություններ և այլն:
ArmLur.am-ը ևս փորձել է ուսումնասիրել եղելությունը և անցկացրել փոքրիկ լրագրողական հետաքննություն:
Ինչպես պարզվում է, խնդիրը սկսվել է ոչ թե ռուսաստանյան ORSIS ընկերության հետ, որը «Промтехнологии» կոնցերնի մասն է կազմում, այլ այդ ընկերության հայաստանյան ներկայացուցիչների հետ: Փորձեցինք գտնել այդ ընկերությունը. ինչպես պարզվեց, հայկական էլեկտրոնային ռեգիստրում կա «Օրսիս Արմս» ՍՊԸ, որը գրանցվել է 2017թ.: Ընկերության հիմնադիրներն են Արթուր Գալստյանը և Գևորգ Մանուկյանը:
Կարճ ուսումնասիրությունից հետո պարզվեց, որ այս երկու անձիք էլ ՀՀ ԶՈւ ուժերի բարձրաստիճան զինվորականներ են, գնդապետներ: Առաջինը գործող գնդապետ է, երկրորդը պահեստազորի: Առաջինն ի դեպ այս սկանդալից հետո իր մասնակցությունը կասեցրել է: Սակայն պարզ է, որ այստեղ կա շահերի բախում և անհասկանալի իրավիճակ: Բարձր աստիճանի զինվորականը ստեղծում է ընկերություն, և այդ ընկերությունը բանակին զենք ու զինամթերք է մատակարարում:
ArmLur.am-ը փորձել է մյուս կողմից ևս մեկնաբանություն ստանալ, սակայն չի հաջողվել: Լրատվականը պատրաստ է հրապարակել նաև երկրորդ կողմի տեսակետը:
Քնար Մանուկյան