«Ձյունիկ Սառնարան» ՍՊԸ սառնարանների պահեստում հրդեհը 99 %-ով հրկիզման պատճառով էր բռնկվել. ձեռնարկատեր

«Ձյունիկ Սառնարան» ՍՊԸ սառնարանների պահեստում հրդեհը 99 %-ով հրկիզման պատճառով էր բռնկվել: Օգոստոսի 28-ին լրագրողների հետ հանդիպման ժամանակ այս մասին ասաց «Արմեն Ամիդ» ՍՊԸ տնօրեն Արմեն Անդրեասյանը:

Նրա խոսքով՝ դեռևս ԱԻՆ փորձաքննության արդյունքները չեն ստացել, սակայն սա աննախադեպ դեպք է, երբ նման չափի հրդեհ է բռնկվում սառնարանային պահեստի տարածքում, որտեղ ջերմաստիճանը տատանվում է մինուս 15-20 աստիճանի շրջանում: «Հնարավոր է՝ դա կապված է մսամթերքի շուկայում այն դերակատարման հետ, որ ունեն «Ձյունիկ Սառնարան» ՍՊԸ-ում արտադրանքը պահող 12 ընկերությունները, գուցե դա կապված է բուն պահեստի գործունեության հետ, որը պահելու ավելի շահավետ պայմաններ է առաջարկում, քան մյուսները»,- նշեց նա:

Անդրեասյանը հավելեց, որ իրենք դիմում են Կառավարությանը և անձամբ վարչապետ Նիկոլ Փաշինյանին՝ խնդրելով, որ պետությունն աջակցի իրենց: «Խոսքն այն մասին է, որ իշխանությունները ԱԱՀ-ն և մաքսատուրքը որպես արտոնություն վերադարձնեն ապրանքների հետագա ներմուծման դեպքում: Միայն մեր ընկերությունը 900 տոննա ապրանքից կորցրել է 600 տոննան, իսկ միայն ԱԱՀ-ից և մաքսատուրքերից վնասը կազմել է 700-800 հազար դոլար: Եթե խոսելու լինենք բոլոր 12 ընկերությունների վնասի մասին, ապա այն կանցնի 30 մլն դոլարից: Այս ընկերություններն ամեն տարի բյուջե են վճարում 2 մլրդ դրամից ավելի»,- շեշտեց նա՝ հավելելով, որ իր ընկերությունն ապրանքը պահելու համար ամսական պահեստին վճարում էր 9 մլն դրամ, սակայն մի քանի ամիս առաջ սկսված սնանկության գործընթացի արդյունքում պահեստի ղեկավարությունը ի վիճակի չէ փոխհատուցում վճարել:

Ձեռնարկատերը հավաստիացրեց, որ միայն վերջերս է իմացել պահեստի սնանկանալու մասին, հակառակ դեպքում վաղուց քայլեր կձեռնարկեր ապրանքն այլ պահեստ տեղափոխելու համար:

«Մենք ինքներս չէինք կարող ապահովագրել մեր ապրանքը, քանի որ ներկրվող ապրանքի քանակն անընդհատ փոխվում է:

«Ձյունիկ Սառնարան» ՍՊԸ-ն, որպես ապրանքների պահպանման պատասխանատու, բոլորիս անունից դիմել է իշխանություններին, և այժմ մենք սպասում ենք պետական մարմինների որոշմանը: Անձամբ ես կարող էի իմ բիզնեսն այլ երկրում շարունակել և տասն անգամ ավելի շատ շահույթ ստանալ, բայց ես դեռ չեմ ուզում դա անել»,- ասաց «Արմեն Ամիդ» ՍՊԸ տնօրենը:

Ըստ Արմեն Անդրեասյանի՝ շուկայից այդպիսի հսկայական քանակությամբ մսամթերքի թողարկումը կարող է հանգեցնել 25-30 տոկոսանոց դեֆիցիտի, և նրանք արդեն ստացել են մոտ 2000 զանգեր որպեսզի հասկանան, թե որ ապրանքների գները բարձրացնեն:

«Բացի այդ, մենք ստիպված կլինենք կրճատել աշխատուժի թիվը: Մենք նաև դիմելու ենք Կենտրոնական բանկ, որպեսզի նա քայլեր ձեռնարկի վարկային պարտավորությունների վճարումները հետաձգելու համար»,- եզրափակեց ձեռնարկատերը:

Մեկ այլ ձեռնարկատեր Ավետիս Սուքիասյանն էլ իր հերթին ասաց, որ իրենք օրական 5 միլիոն դրամ են ծախսում ապրանքներն այլ վայրեր տեղափոխելու համար:

Հիշեցնենք, որ օգոստոսի 19-ին՝ ժամը 13:54-ին, Արշակունյաց պողոտայում «Ձյունիկ Սառնարան» ՍՊԸ շենքի 3-5 հարկերում (յուրաքանչյուր հարկի մակերեսը 740 քառ մ է) հրդեհ էր բռնկվել, որը մարում էին մի քանի օր: