Բանգլադեշցի կանանց թույլ են տվել հարսանիքից առաջ այլևս չտեղեկացնել կուսության մասին
Բանգլադեշում հարսնացուներն այլեւս կարող են հարսանիքից առաջ չտեղեկացնել իրենց կուսության մասին։ Նման որոշում է կայացրել Գերագույն դատարանը, գրում է Լենտան՝ հղում կատարելով South China Morning Post-ին։
Մինչ այդ որոշումը բանգլադեշցի կանայք ըստ օրենքի ամուսնական վկայականում պետք է նշեին, թե արդյոք կումարի են, այսինքն՝ կույս, այրի կամ ամուսնալուծված։ Այժմ պետությանը պարտավորեցրել են առաջին կետը փոխարինել «չամուսնացած»-ով։ Բացի այդ, իր կարգավիճակի մասին պետք է տեղեկացնի նաեւ փեսացուն, ինչն առաջ չի արվել։ Նա պետք է ընտրություն կատարի նույն տարբերակներից։
South China Morning Post-ը նշում է, որ իշխանությունները չեն մեկնաբանել դատավճիռը, որը կայացվել է օգոստոսի 25-ին։ Չի ճշտվում նաեւ, թե երբ է վճիռն ուժի մեջ մտնելու։
Գործը դիտարկվում էր 2014 թվականից։ Դրա վրա աշխատող փաստաբանները նշել են, որ դատարանի որոշումը հույս է ներշնչում, որ հետագայում փոփոխություններ կկատարվեն կանանց կյանքում։ Նրանք նաեւ նշել են, որ կուսության մասին կանանց հարցում անելը հակասում է անձնական կյանքի իրավունքին։
Ամուսնությունների եւ ամուսնալուծությունների մասին օրենքը մուսուլմանական մեծամասնություն ունեցող Բանգլադեշում ընդունվել է 1974 թվականին։