Ծեծել են «Օրենքով գող» Գուրամ Չիխլաձեին, որը քրեական շրջանակում հայտնի է Կվեժովիչ անունով
«Օրենքով գող» 35-ամյա Գուրամ Չիխլաձեին, որը քրեական շրջանակում հայտնի է Կվեժովիչ անունով, Թբիլիսիում ծեծել են Ադրբեջանի գլխավոր հեղինակություն՝ «օրենքով գող» Նադիր Սալիֆովի (Գուլի) հետ հանդիպման ժամանակ, հայտնում է «Փրայմ Կրայմը»:
Հանդիպումը տեղի է ունեցել նախօրեին, Չիխլաձեն եւ Սալիֆովն առաջին անգամ էին հանդիպում: Բանակցությունները կազմակերպվել էին Ռուսաստանի հանցավոր աշխարհի պարագլուխ՝ «օրենքով գող» Զաքարիա Քալաշովի (Շաքրո Մոլոդոյ) օժանդակությամբ, որը Սալիֆովին խնդրել էր Չիխլաձեի հետ մեղմ լինել:
Չիխլաձեն, սակայն, հանդիպման ժամանակ բոլորի համար անսպասելի սկսել է իրեն հանդգնորեն պահել եւ իր ընկերներ է անվանել Ռովշան Ջանիեւի (Լենքորանսկի) կողմնակիցներին, որոնք մասնակցել են 2017 թվականին Սալիֆովի տան վրա ահաբեկչական հարձակմանը: Չիխլաձեն նաեւ հայտարարել է, որ Ջանիեւի կողմնակիցները «քածեր» չեն, ինչպես նրանց անվանում է Սալիֆովը:
Սալիֆովի կողմնակիցներից մեկը, սակայն, որոշել է Չիխլաձեին դաս տալ՝ համարելով, որ «օրենքով գողը» իրեն չափից ավելի հանդուգն է պահում իր տիրոջ առջեւ: Արդյունքում՝ Չիխլաձեին ծեծել են անմիջապես Սալիֆովի առաջ, որից հետո տուժածը շտապել է հեռանալ: Նրան նեղացնողը ոմն Արման էր՝ ազգությամբ ղազախ եւ նոր «օրենքով գող» թագադրվելու թեկնածուներից մեկը:
Միջադեպից հետո Արմանն ինքը հայտարարել է, թե չգիտեր ում վրա է ձեռք բարձրացնում: Նրա տեր Սալիֆովն իր հերթին հայտնել է, որ թույլ չի տա իր մարդուն նեղացնեն եւ անհրաժեշտության դեպքում նրան ինքը կպատժի: