Ամուլսարը չի կարող շահագործվել երկու պատճառի դեպքում. Էկոնոմիկայի նախարար

«Անցած վեցամսյա ժամանակահատվածում գրանցվել է 6,8 տոկոս ՀՆԱ-ի աճ, վերամշակող արդյունաբերությունն ավելի առաջանցիկ աճ էր ապահովել, քան հանքարդյունաբերությունը: Մեր տնտեսական կյանքում նշանակություն ունի լեռնահանքային արդյունաբերությունը, մենք պետք է լինենք հետևողական և պատասխանատու, որ այն լինի բնապահպանական չափանիշներին համապատասխանող: Կարճաժամկետ հատվածում վերադասավորումները որոշակի իներցիոն բնույթ են ունենում, և դեռևս զգալի ժամանակ լեռնահանքային արդյունաբերության ոլորտի զգալի ազդեցություն կլինի Հայաստանի տնտեսական արդյունքների վրա. մեր ամբողջ արտահանման կառուցվածքում 30 տոկոսը լեռնահանքային ոլորտի արտադրանք է,- «Առաջին լրատվական»-ի հետ զրույցում այս մասին ասել է Էկոնոմիկայի նախարար Տիգրան Խաչատրյանը:

Նախարարն անդրադարձել է նաև այն տնտեսական գործոններին, որոնք Ամուլսարի շահագործման դեպքում ազդեցություն կունենան քաղաքացիների տնտեսական բարեկեցության վրա. «Կազմակերպությունը հավաստիացնում է, որ Ամուլսարի շահագործման տարիների ընթացքում այնտեղ աշխատանք կունենա 750 աշխատակից՝ 450-500 հազար դրամ միջին աշխատավարձով, միջազգային կազմակերպությունների գնահատականներով յուրաքանչյուր ուղղակի աշխատատեղին զուգահեռ կստեղծվի 4-5 անուղղակի աշխատատեղ: Կազմակերպությունը հայտարարել է, որ ամեն տարի պետական բյուջե կվճարի 45-50 մլն դոլար հարկեր…»:

Տ. Խաչատրյանի խոսքով՝ կառավարության հիմնական եզրակացությունն այս հարցի առնչությամբ այն է, որ տվյալ հանքի շահագործմամբ՝ Ջերմուկի ապագան, որպես առողջարանային քաղաք, վտանգված չէ. «Ըստ բնապահպանական եզրակացության՝ հանքավայրի շահագործումը Ջերմուկի ջրերի վրա որևէ բացասական ազդեցություն ունենալ չի կարող»:

«Ամուլսարը չի կարող շահագործվել երկու պատճառի առկայության դեպքում»,- նշել է նախարարը՝ ներկայացնելով իր դիտարկումները: Նա նաև անդրադարձավ ընդերքօգտագործման վերաբերյալ օրենսդրությանը՝ հավելելով, որ գործող օրենսդրությունը փոփոխությունների է ենթարկվել և անհրաժեշտության դեպքում այժմ էլ կարող է լրացվել:

Մանրամասն՝ տեսանյութում: