Ինչո՞ւ ամեն հարց պետք է լուծվի ճամփաներ փակելուց հետո միայն. Արճիսի բնակիչների հետ հանդիպման էր եկել մարզպետը և հավաստիացրել, որ այսօր բնակիչները ջուր կունենան

Խմելու ջրի խնդրից բողոքող Արճիս համայնքի բնակիչների հետ հանդիպման էր եկել Տավուշի մարզպետ Հայկ Չոբանյանը։

Նա բնակիչների հետ զրույցում ասաց, որ Լոռի-Բերդ ջրագծից Արճիս համայնքի բնակիչներին կտրվի հանգույց, բնակիչները ջուր կունենան. «Սա ժամանակավոր լուծում է, կառավարությունը կլուծի ֆունդամենտալ խնդիրը»։

Հայկ Չոբանյանը դժգոհեց համայնքապետից եւ ավագանուց, որ չեն եկել մարզպետարան հարցը քննարկելու եւ լուծումներ գտնելու համար. «Պետությունը, կառավարությունը ֆունդամենտալ խնդիրը լուծում է, այս փոքր խնդիրը համայնքի մակարդակում պետք է լուծվեր, եթե ի վիճակի չէր համայնքը լուծել, համայնքապետը ավագանու հետ միասին պետք է գային մեզ մոտ, քննարկեինք, ասեինք՝ ո՞նց լուծենք, պարտադիր պիտի գանք, 100 հոգի մարդ հավաքեք, այս մարդկանց գործից գցե՞ք»։

Բնակիչները հակադարձեցին, թե ինչու, օրինակ, մեկ ամիս առաջ ջրի խնդիրը չէին լուծում, որին մարզպետը պատասխանեց. ««Վեոլիա ջրի» գծի մասին մերոնք են պարզել 5 օր առաջ, ուրբաթ օրը համայնքի ղեկավարը սահմանված կարգով ՀԾԿՀ նամակ է ուղարկել, այսօր էլ խնդիրը լուծել ենք»։

Դիտարկմանը, թե համայնքի ղեկավարը բարձրաձայնել է, սակայն ոչ ոք չի արձագանքել, մարզպետն ասաց. «Ուրեմն այն մարդուն չի տեղեկացրել, ով պետք է արձագանքի»։

Համայնքի բնակիչները բացեցին ճանապարհը մարզպետի հավաստիացումից հետո, որ այսօր նրանք ջուր են ունենալու։

Հիշեցնենք, ավելի վաղ Operativ լրատվականը հաղորդել էր, որ Արճիս համայնքի բնակիչները փակել են Բագատաշեն-Ալավերդի միջպետական ճանապարհը:

ՄԻՊ-ը հետևում էր Արճիսում խմելու ջրի բացակայության պատճառով իրականացվող բողոքի ակցիային