«Մալաթիա մոլ» է ժամանել Վալերի Օսիպյանը
Քիչ առաջ Operativ լրատվականը հաղորդել էր, որ արտակարգ դեպք է տեղի ունեցել Երևանում:
Այսօր՝ օգոստոսի 24-ին, ժամը 15:47-ին «911» ծառայությանն ահազանգ է ստացվել, որ Երևան քաղաքի Սեբաստիա փողոցում գտնվող «Մալաթիա մոլ»-ի շենքում հրդեհ է բռնկվել, կան տուժածներ:
«Մալաթիա մոլ»-ի տարածքում խոշոր հրդեհի վայր է ժամանել ՀՀ ոստիկանախպետ Վալերի Օսիպյանը:
«Աշխատասենյակում տեսա, որ հրդեհի ծավալը մեծ է, տարածվում է, շատ ժողովուրդ կա հավաքված, և հարկ համարեցի այստեղ գտնվել, գնահատել իրավիճակը և, ինչու ոչ, ղեկավարել այն մասով, որը վերաբերում է ոստիկանությանը»,- լրագրողներին ասաց նա՝ հրաժարվելով պատասխանել այլ հարցերի:
Նա նաև հավելեց, որ այս պահին հնարավոր չէ որևէ գնահատական տալ. «Եթե որևէ մեկը հիմա գնահատական տա, նշանակում է ինքը կոմպետենտ չի ընդհանրապես: Մինչև կրակը չմարեն, մասնագետները չաշխատեն, որևէ մեկն ի վիճակի չէ գնահատական տալ»:
Հիշեցնենք, դեպքի վայրում է նաև սեփականատեր Սամվել Ալեքսանյանը:
Հրդեհը բռնկվել է Մալաթիա-Սեբաստիա վարչական շրջանում գտնվող «Վեգա» խանութների ցանցում՝ մասնավորապես կահույքի վաճառքի հատվածում, դեռևս անհայտ պայմաններում:
Քաղաքացիները, որոնք ամենայն հավանականությամբ, «Մալաթիա մոլ»-ի աշխատակիցներ են, իրենց վտանգելով ներսից դուրս են բերում վաճառքի ենթակա ապրանքները, այդ թվում կահույք, կենցաղային տեխնիկա, հեծանիվներ, կահույքի հումք և այլն:
Հրդեհի բարդության «Թիվ 2» կանչով դեպքի վայր են մեկնել ԱԻՆ ՓԾ Երեւան քաղաքի փրկարարական վարչության հրշեջ-փրկարարական ջոկատից 10 մարտական հաշվարկ, երկու ավտոսանդուղք, փրկարարական ուժերի վարչության հատուկ նշանակության փրկարարական աշխատանքների իրականացման կենտրոնի փրկարարական ջոկատը, ճգնաժամային կառավարման ազգային կենտրոնի արտակարգ իրավիճակների արձագանքման եւ օպերատիվ խմբերը, ինչպես նաեւ հոգեբանական աջակցության բաժնի հոգեբանական խորհրդատվության գծով հրահանգիչը:
Ժամը 16:35-ին հրդեհի բարդության աստիճանը բարձրացվել է «Թիվ 3» կանչի:
Operativ լրատվականը նաև հղում կատարելով Azatutyun լրատվականին, ուղիղ հեռարձակում էր տեսանյութ՝ դեպքի վայրից:
Մինչ այդ խոսվում էր «Մալաթիա մոլ»-ում հրդեհի հետևանքով 3 տուժածների մասին, որոնք ծխահարվել են, լուրջ վնասվածքներ չունեն:
Ապա հայտնի դարձավ, որ Երևանում «Մալաթիա մոլ»-ում բռնկված հրդեհի հետևանքով տուժածների թիվը հասել է 6-ի:
Մալաթիայի հրդեհից տուժածներից երկուսը Հանրապետական հիվանդանոցի թունաբանական բաժանմունքում են: