«Մալաթիա մոլ»-ում հրդեհի հետևանքով 3 տուժածները ծխահարվել են, լուրջ վնասվածքներ չունեն. Նոր մանրամասներ այսօր Երևանում ծագած հրդեհի դեպքի վայրից
Երևանում «Մալաթիա մոլ»-ում բռնկված հրդեհի հետևանքով 3 տուժածները լուրջ վնասվածքներ չունեն, նրանք ծխահարված են: Այս մասին News.am լրատվականին հայտնել է «Աստղիկ» ԲԿ-ի գլխավոր բժշկի տեղակալ Ռոբերտ Կուրղինյանը:
«3 երիտասարդ է տեղափոխվել մեզ մոտ, նրանք գտնվում են ընդունարանում, լուրջ վնսասվածքներ չեն ստացել, ծխահարված են, նրանց թթվածին են այս պահին տալիս»,-ասաց նա:
Հիշեցնենք, քիչ առաջ Operativ լրատվականը հաղորդել էր, որ այսօր՝ օգոստոսի 24-ին, ժամը 15:47-ին «911» ծառայությանն ահազանգ է ստացվել, թե Երևան քաղաքի Սեբաստիա փողոցում գտնվող «Մալաթիա մոլ»-ի շենքում հրդեհ է բռնկվել, կան տուժածներ:
Դեպքի վայրում է նաև «Մալաթիա մոլ»-ի սեփականատեր, հայտնի գործարար Սամվել Ալեքսանյանը:
Հրդեհի բարդության «Թիվ 2» կանչով դեպքի վայր են մեկնել ԱԻՆ ՓԾ Երեւան քաղաքի փրկարարական վարչության հրշեջ-փրկարարական ջոկատից վեց մարտական հաշվարկ, երկու ավտոսանդուղք, փրկարարական ուժերի վարչության հատուկ նշանակության փրկարարական աշխատանքների իրականացման կենտրոնի փրկարարական ջոկատը, ճգնաժամային կառավարման ազգային կենտրոնի արտակարգ իրավիճակների արձագանքման եւ օպերատիվ խմբերը, ինչպես նաեւ հոգեբանական աջակցության բաժնի հոգեբանական խորհրդատվության գծով հրահանգիչը:
Ժամը 16:35-ին հրդեհի բարդության աստիճանը բարձրացվել է «Թիվ 3» կանչի. դեպքի վայր է մեկնել ԱԻՆ ՓԾ Երեւան քաղաքի փրկարարական վարչության հրշեջ-փրկարարական ջոկատից չորս մարտական հաշվարկ:
Operativ րատվականը, հղում կատարելով Azatutyun լրատվականին, ուղիղ միացմամբ ցուցադրում է նաև դեպքի վայրում ծավալվող իրադարձությունները:
Կտրվի լրացուցիչ տեղեկություն: