Պոմպեոն Դանիայի ԱԳ նախարարի հետ քննարկել է Գրենլանդիայի հարցը

ԱՄՆ պետքարտուղար Մայք Պոմպեոն Դանիայի ԱԳ նախարար Յեպե Կոֆոդի հետ հեռախոսային զրույցում քննարկել է ԱՄՆ նախագահ Դոնալդ Թրամփի այցի հետաձգման հարցը, ինչպես նաև 2 երկրների համագործակցության խորացումը, այդ թվում՝ նաև Գրենլանդիայում, փոխանցում է «Ինտերֆաքսը»՝ վկայակոչելով ԱՄՆ Պետքարտուղարության հաղորդագրությունը:

«ԱՄՆ պետքարտուղարը Դանիային երախտագիտություն է հայտնել որպես Միացյալ Նահանգների դաշնակիցներից մեկը համագործակցության և Դանիայի ավանդի համար անվտանգության ոլորտում ընդհանուր գլոբալ խնդիրների լուծման մեջ»,- նշված է Պետքարտուղարության հաղորդագրության մեջ:

Նշվում է, որ Պոմպեոն և Կոֆոդը նաև քննարկել են Դանիայի Թագավորության հետ համագործակցության խորացման հարցերը, այդ թվում՝ Գրենլանդիա կղզում:

Հիշեցնենք, Operativ լրատվականը հաղորդել էր, որ անցյալ շաբաթ The Wall Street Journal-ը, վկայակոչելով իր աղբյուրներին, հայտնել էր, թե ԱՄՆ նախագահ Դոնալդ Թրամփն իր խորհրդականներից հետաքրքրվել է Գրենլանդիան գնելու հնարավորության մասին: Միացյալ Նահանգների ղեկավարն ավելի ուշ սա հաստատել էր:

Թրամփը խոստացել էր Գրենլանդիան գնելու դեպքում այնտեղ երկնաքերներ չկառուցել

Գրենլանդիայի կառավարությունը մամուլի հաղորդագրությամբ հայտարարել էր, որ կղզին չի վաճառվում: Սակայն Դանիայի թագավորական ընտանիքը չէր բացառել Գրենլանդիայի վաճառքը :

Այս շաբաթ Դանիայի վարչապետ Մեթե Ֆրեդերիքսենը ԱՄՆ կողմից Գրենլանդիան գնելու թեման «անհեթեթ» էր անվանել:

Այնուհետեւ հայտնի էր դարձել, որ Թրամփն անորոշ ժամանակով հետաձգել է սեպտեմբերի սկզբին նախատեսված Ֆրեդերիքսենի հետ հանդիպումը, քանի որ նա չի ցանկանում գործարքը քննարկել:

Դանիայի վարչապետը Կոպենհագեն այցը հետաձգելու Թրամփի որոշումը մեկնաբանելիս հայտարարել էր, որ ԱՄՆ-ն նախկինի պես Դանիայի դաշնակիցն է, և 2 երկրների հարաբերությունները ճգնաժամային համարել չի կարելի: