Ակտիվիստ Գեղամ Ադյանը տեղափոխվել է հիվանդանոց

Ակտիվիստ Գեղամ Ադյանը Արաբկիր ոստիկանության մոտից տեղափոխվել է «Սուրբ Գրիգոր Լուսավորիչ» ԲԿ: Այս մասին News.am-ի հետ զրույցում ասաց ԲԿ տնօրենի տեղակալ Արտակ Մանուկյանը:

Տնօրենի տեղակալն ասաց, որ նա հայտարարում է` իրեն խփել են, սակայն ըստ դիագնոզի` նրա մոտ նեւրոտիկ ռեակցիա է, սրտի ռիթմի խանգարում:

Այժմ բուժզննում է իրականացվում, հիվանդի վիճակը գնահատվում է բավարար:

Ավելի վաղ Operativ լրատվականը հաղորդել էր, որ ԱԺ-ի մոտ Ամուլսարի շահագորման դեմ բողոքող 6 ակտիվիստներ են բերման ենթարկվել:

Հայտնել էինք նաև, որ Քննչական կոմիտեն հրապարակել էր Ամուլսարի ոսկեբեր քվարցիտների հանքավայրի շահագործման հետ կապված համալիր փորձաքննության արդյունքները, որի կատարումը հանձնարարվել էր Advanced Resources Development (ELARD) ընկերության փորձագետների խմբին:

Ըստ այդ փորձաքննության արդյունքների՝ եզրակացության ընթացքում 16 կետ է նշվել, որոնք պահպանելու դեպքում բնապահպանական ռիսկերը կդառնան կառավարելի:

Բաղրամյան 26-ում վարչապետ Նիկոլ Փաշինյանը ջերմուկցիներին հրավիրել էր հանդիպման:

Միաժամանակ Բաղրամյան-26-ի դիմաց բողոքի ակցիա էր ընթանում ընդդեմ Ամուլսարի հանքի շահագործման:

Ցուցարարներից մեկն էլ ասել էր, թե՝ «Սերժիզմը շարունակվում է ու եթե ինքը չսթափվի, ինքը արժանանալու է Սերժ Սարգսյանի ճակատագրին»:

«Նիկոլը ազգի դավաճան է, Նիկոլը Սերժի շարունակությունն է», նման կերպ արտահայտվել էր ակտիվիստ Թեհմինե Ենոքյանը:

Քիչ առաջ էլ Փաշինյանի և «Իմ քայլի» պատգամավորների հանդիպումն ավարտվեց. վարչապետը ուղիղ եթերում հանդես կգա հայտարարությամբ: