Այն ինչ նախատեսվում էր, չեղավ, հարցը որոշված էր. Փաստաբանը Ամուլսարի հարցով հանդիպման մասին
Այն, ինչ նախատեսվում էր, որ քննարկում լինի մասնագետների մասնակցությամբ, չեղավ: Այս մասին այսօր` օգոստոսի 19-ին, լրագրողներին ասաց փաստաբան Նազելի Վարդանյանը՝ Բաղրամյան 26-ում Ամուլսարի հարցով վարչապետի հետ քննարկումից հետո:
«Այն, ինչ նախատեսվում էր, որ քննարկում լինի մասնագետների մասնակցությամբ, չեղավ, չնայած հնարավորություն եղավ, որ մենք մեր պնդումները շատ արագ ներկայացնենք, բայց արդեն ոնց որ հարցը որոշված էր, որ ամեն ինչ պետք է արվի քրեական գործի սահմաններում: Քրեական գործը լրիվ դատավարության նորմերի խախտումով է արվում եւ «Էլարդի» այս ուսումնասիրության հիման վրա չի կարելի հայտարարել, որ այս գործը պետք է կարճվի»,- ասաց Վարդանյան` հավելելով, որ հայտարարություններ չի անի, կսպասի գործը կարճվի, հետո իր մասնագիտական հայտարարությունը կներկայացնի:
Հարցին, թե քննարկման ժամանակ ի՞նչ հստակ գնահատականներ հնչեցին հանքի շահագործման հեռանկարների մասով՝ Վարդանյանն ասաց. «Նույնիսկ իրենք էլ չեն հասկանում՝ ինչ են ասում: Մի նախադասությամբ ակնարկեց, որ նոր փորձաքննություն կլինի»:
Դիտարկմանը, թե վարչապետի մամուլի խոսնակը լրագրողներին ավելի վաղ հայտնել, որ նոր փորձաքննության անհրաժեշտություն չեն տեսնում, փաստաբանը շեշտեց. «Պարոն վարչապետը հայտարարեց, որ նոր փորձաքննություն կլինի»:
Ավելի վաղ Operativ լրատվականը հայտնել էր, որ Քննչական կոմիտեն հրապարակել էր Ամուլսարի ոսկեբեր քվարցիտների հանքավայրի շահագործման հետ կապված համալիր փորձաքննության արդյունքները, որի կատարումը հանձնարարվել էր Advanced Resources Development (ELARD) ընկերության փորձագետների խմբին:
Ըստ այդ փորձաքննության արդյունքների՝ եզրակացության ընթացքում 16 կետ է նշվել, որոնք պահպանելու դեպքում բնապահպանական ռիսկերը կդառնան կառավարելի:
Բաղրամյան 26-ում վարչապետ Նիկոլ Փաշինյանը ջերմուկցիներին հրավիրել էր հանդիպման:
Միաժամանակ Բաղրամյան-26-ի դիմաց բողոքի ակցիա էր ընթանում ընդդեմ Ամուլսարի հանքի շահագործման:
Հիշեցնենք նաև, որ Ամուլսարի շահագործման դեմ բողոքի ակցիայի մասնակիցներից 6 անձ բերվել է ոստիկանություն :