Արմավիրի մարզպետի շուրջ ստեղծված սկանդալ. արդյո՞ք վարչապետ Նիկոլ Փաշինյանին չեն խաբել
2010 թ.-ի նոյեմբերի 21-ին Հ. Մաթևոսյանը զինծառայության հերթական զորակոչից չարամտորեն խուսափել է և չի ներկայացել զինվորական կոմիսարիատ, ինչի համար 21.01.2011թ.-ին ՀՀ քր օր-ի 327 հոդվածի 1-ին մասով հարուցվել է թիվ 18103311 քրեական գործը:
Հ. Մաթևոսյանը ներգրավվել է որպես մեղադրյալ և նկատի ունենալով, որ չարամտորեն թաքնվում է քննությունից, նրա նկատմամբ հայտարարվել է հետախուզում, խափանման միջոց է ընտրվել կալանավորումը:
03.02. 2011 թ-ին ոստիկանության Գյումրիի բաժնի կողմից կազմվել է թիվ 18401111 հետախուզական գործը և Հ. Մաթևոսյանի նկատմամբ հայտարարվել է ֆեդերալ հետախուզում:
Հ. Մաթևոսյանը դեռևս 26 տարեկան է, սակայն անհայտ պատճառով այդպես էլ պետության նկատմամբ իր սահմանադրական պարտքը չկատարելով, հայտնվել է ՀՀ Արմավիրի մարզպետի աթոռին: Իսկ թե ինչու չի անցել զինվորական ծառայության և ինչու է մարզպետարանի կայքում նրա պաշտոնական էջում նշված, որ զինապարտ չէ, թող պատկան մարմինները պարզեն:
Վերջիններս թող պարզեն նաև այն հանգամանքը, թե ինչպես է ստացվել, որ համապատասխան տեղեկատվական կենտրոնում բացակայում է Հ. Մաթևոսյանի վերաբերյալ վերը նշված տեղեկությունները:
Քիչ առաջ Արմավիրի մարզպետարանից խնդրի վերաբերյալ պարզաբանում ենք ստացել, որը ներկայացնում ենք ստորև.
Հերքում՝ «Սկանդալ Արմավիրի մարզպետի շուրջ. արդյոք վարչապետ Նիկոլ Փաշինյանին չեն խաբել» SHAMSHYAN.com լրատվական կայքում տպագրված հոդվածի առնչությամբ.
SHAMSHYAN.com լրատվական կայքում «Սկանդալ Արմավիրի մարզպետի շուրջ. արդյոք վարչապետ Նիկոլ Փաշինյանին չեն խաբել» հոդված է տպագրվել, որի առնչությամբ հարկ ենք համարում հայտնել, որ այն հերյուրանք է և չի համապատասխանում իրականությանը։
ՀՀ Արմավիրի մարզպետ Համբարձում Մաթևոսյանն իր կյանքի և գործունեության ընթացքում իրավապահ համակարգի հետ կապված խնդիրներ երբևէ չի ունեցել։
Իսկ Համբարձում Մաթևոսյանի կենսագրությանը ծանոթանալով՝ կարող եք տեղեկանալ, որ 2009-2012 թթ. նա սովորել և ավարտել է ԱՄՆ-ի Կալիֆորնիա նահանգի Գրոսմոնտ քոլեջի Համաշխարհային գիտությունների բաժինը: 2012 -2015 թթ. էլ սովորել և ավարտել է ԱՄՆ Կալիֆորնիա նահանգի Սան Դիեգոյի պետական համալսարանի միջազգային հարաբերություններ, միջազգային անվտանգություն և հակամարտության կարգավորում ֆակուլտետը` համագործակցություն, հակամարտություն, կոնֆլիկտաբանություն մասնագիտությամբ:
Խնդրում ենք «Զանգվածային լրատվության մասին» ՀՀ օրենքի 8-րդ հոդվածի 1-ին կետով սահմանված կարգով և 2-րդ կետով սահմանված ժամկետում, նույն օրենքի 8-րդ հոդվածի 3-րդ կետի պահանջների պահպանմամբ հրապարակել համապատասխան հերքումը «Armday.am» լրատվական կայքում և ֆեյսբուքյան էջում: