Կառավարությունը հավելյալ 71 մլն 328 հազար դրամ հատկացրեց հաշմանդամություն ունեցող անձանց աջակցող սարքերի համար

Կառավարությունն այսօր՝ օգոստոսի 15-ի նիստում որոշում կայացրեց պետական բյուջեի վերաբաշխման միջոցով հատկացնել հավելյալ 71 մլն 328 հազար դրամ՝ թվով 1253 պրոթեզաօրթոպեդիկ եւ վերականգնողական պարագաների, վերականգնմանն աջակցող այլ տեխնիկական միջոցներ համար։ Որոշման նախագիծը ներկայացրեց աշխատանքի եւ սոցիաալական հարցերի նախարար Զարուհի Բաթոյանը։

«Նախագծի ընդունման անհրաժեշտությունը պայմանավորված է պրոթեզաօրթոպեդիկ եւ վերականգնողական պարագաների, վերականգնմանն աջակցող այլ տեխնիկական միջոցներ ստանալու նպատակով` 2019 թվականի առաջին կիսամյակի ընթացքում նախատեսվածից ավելի շահառուների դիմելու հանգամանքով:

ՀՀ պետական բյուջեի միջոցներով «Հաշմանդամություն ունեցող անձանց աջակցություն» ծրագրի «Հաշմանդամություն ունեցող անձանց աջակցող տեխնոլոգիաներով ապահովում եւ դրանց վերանորոգում» եւ «Լսողական սարքեր եւ հաշմանդամի սայլակներ ձեռքբերելու համար հավաստագրերի տրամադրում» միջոցառումների շրջանակներում շահառուներին, պետական հավաստագրերի հիման վրա, տրամադրվում են պրոթեզաօրթոպեդիկ եւ վերականգնողական պարագաներ, վերականգնմանն աջակցող այլ տեխնիկական միջոցներ (այսուհետ` աջակցող միջոցներ)` որակավորված եւ նախարարության հետ պայմանագիր կնքած կազմակերպությունների կողմից: Պետական հավաստագրերի հիման վրա աջակցող միջոցների տրամադրումը հնարավորություն է ընձեռում անձին ընտրություն կատարել եւ ձեռք բերել իր կարիքի առավելագույնս հարմար աջակցող միջոցները: Այս հանգամանքով, միաժամանակ հանրային իրազեկման բարձրացմամբ պայմանավորված` մեծացել է շահառուների դիմելիությունը, եւ որոշ աջակցող միջոցների` 2019 թվականի տարեկան բյուջեով նախատեսված քանակը սպառվել է:

Հաշվի առնելով վերոգրյալը, անհրաժեշտ է տրամադրվող որոշ աջակցող միջոցների քանակը ավելացնել պետական բյուջեի վերաբաշխման միջոցով՝ հատկացնելով հավելյալ 71 մլն 328 հազար դրամ թվով 1253 աջակցող սարքի համար»,–նշեց նա։