Լեհվազի հրդեհի հետ կապված ԱԻՆ լրացուցիչ ուժեր են ուղարկվել. Կառավարության նիստին Ֆելիքս Ցոլակյանը Նիկոլ Փաշինյանին ներկայացրել է հրդեհների վիճակագրությունը
Լեհվազի հրդեհի հետ կապված ԱԻՆ լրացուցիչ ուժեր են ուղարկվել։ Այս մասին այսօր՝ օգոստոսի 15-ին հրավիրված կառավարության նիստին ասաց արտակարգ իրավիճակների նախարար Ֆելիքս Ցոլակյանը։
«Այդ գիհիները տակից վառվում են, աննկատ բան է, անընդհատ կրակը տեղ-տեղ դուրս է գալիս, մի օջախը հանգցնում ենք, երկրորդ օջախն է առաջանում, Խոսրովում էլ այդպես եղել։ Հիմա այնտեղ մոտ 2 հա տարածություն էր այրվում, տարածության դեմը ճանապարհով փակել են, մեր աշխատակիցները ինձ վստահեցնում են, որ մինչեւ ժամը 4-ը կպահեն, բայց 4-ին կերեւա՝ շարունակությունն ինչ է լինելու, եղանակի տաքացման հետ կապված, ինչպես նաեւ վտանգավոր է քամի լինելու հանգամանքը։ Քամի չի կանխաատեսվում, բայց հողի տակով գնալու ֆակտորը շատ վտանգավոր է, քանի որ տարածման վտանգը միշտ կա։ Հիմա այսօր առավոտյան 6-ից հանգցնում են, հանգցնում են ենթադրենք 15 օջախ, մեկ ուրիշ տեղ նոր մի 10 օջախներ են գոյանում։ Ճանապարհն անցած անգամ մենք բացեցինք. Մի քիչ նորմալացրեցինք, հիմա այնտեղ՝ սարի գագաթը ջրի մեքենա էլ է հասել»,–նշեց Ֆելիքս Ցոլակյանը։
ՀՀ վարչապետ Նիկոլ Փաշինյանն արձագանքեց, որ վիճակագրությամբ բուսածածկ տարածքների հրդեհները նախորդ տարվա համեմատ աճել են 83.9 տոկոսով։ Վարչապետը կոչ արեց բնության միջավայրում ցուցաբերել պատասխանատվություն. «Այս կուլտուրան մեզ մոտ պրոբլեմատիկ է»։
Փաշինյանը շեշտեց նաեւ, որ հրդեհների հարցով պետք է օպերատիվ աշխատանք տարվի. «Պետք է նաեւ օպերատիվ աշխատանք տարվի, քանի որ կարծիքներ են հնչում, որ հրդեհները հատուկ են արվում, այստեղ ոստիկանությունն ու ԱԱԾ-ն աշխատանք պետք է տանեն»։
Ավելի վաղ Operativ լրատվականը հայտնել էր, որ Լեհվազ-Վարդանիձոր ավտոճանապարհին գտնվող անտառում հրդեհ էր բռնկվել, որի կապակցությամբ օգոստոսի 11-ին, ժամը 21-ին արտակարգ իրավիճակների նախարար Ֆելիքս Ցոլակյանը հրավիրել էր օպերատիվ աշխատանքային խմբի արտահերթ նիստ: