Երևանի քաղաքապետի հետ վարչապետի անցկացրած հանդիպումը հերթական վկայությունն է այն բանի, որ Հայաստանում բոլոր խնդիրները լուծվում են Նիկոլ Փաշինյանի մասնակցությամբ միայն

Վարչապետ Նիկոլ Փաշինյանն աշխատանքային հանդիպում էր անցկացրել Երևանի քաղաքապետ Հայկ Մարությանի հետ: Անցկացրել ու հանդիպումը հեռարձակել էր ուղիղ եթերով: Հիրավի դիտարժան տեսարան: Երկրի առաջին դեմքը ու մայրաքաղաքի ղեկավարը քննարկում են… աղբահանության հարցը: Երևանի քաղաքապետարանի վարչության պետի մակարդակի խնդիրն այսպիսով հասցվել է վարչապետի լուծման տիրույթ: Սակայն այնպես չէ, որ քաղաքապետի հետ հանդիպման ժամանակ վարչապետը լուծումներ է առաջարկում: Նրանք ընդամենն արձանագրում են աղբահանության ոլորտում առկա խնդիրները, խայտառակ վիճակը, քննարկում են «Սանիտեք» ընկերության պայմանագրային պարտավորություններին առնչվող ինչ-ինչ հարցեր, վարչապետը առիթն օգտագործում է նաև քաղաքական ակնարկներ անելու համար: Այդ ամենի արդյունքում, սակայն, որևէ լուծում չի առաջարկվում Երևանի աղբահանության իսկապես խայտառակ ու անթույլատրելի վիճակի լուծման համար:

Երևանի քաղաքապետի հետ վարչապետի անցկացրած հանդիպումը հերթական վկայությունն է այն բանի, որ Հայաստանում բոլոր խնդիրները լուծվում են Նիկոլ Փաշինյանի մասնակցությամբ միայն: Դա խոսում է համակարգային ճգնաժամի, համակարգերի անգործության ու անկատարության մասին: Հայկ Մարությանը Երևանի քաղաքապետի պաշտոնը զբաղեցնում է արդեն շուրջ մեկ տարի, սակայն այդ մեկ տարվա ընթացքում չի կարողացել լուծումներ, այլընտրանքներ գտնել մայրաքաղաքի աղբահանության տարրական խնդիրը լուծելու համար: Աղբահանության խայտառակ պատկերը Հայկ Մարությանի տապալման պատկերն է: Դա, սակայն, իր հերթին Նիկոլ Փաշինյանի տապալման, երևանյան տապալման վկայությունն է:

Հասարակության համար այդպես էլ անհասկանալի մնաց, թե ինչ սկզբունքով, ինչ որակների ու հատկությունների համար նախորդ տարի Երևանի քաղաքապետի պաշտոնում Նիկոլ Փաշինյանն ընտրեց հատկապես Հայկ Մարությանին: Այո՛, նրան ընտրեց Նիկոլ Փաշինյանը, քանի որ Երևանի քաղաքապետի ընտրությունը հեղափոխությանը հաջորդած առաջին ընտրությունն էր, և քաղաքապետ էր դառնալու նա, ում անունը հնչեցներ Նիկոլ Փաշինյանը: Կամ չունենալով ընտրության այլ տարբերակներ, կամ այլ՝ ոչ հայտնի պատճառներով Նիկոլ Փաշինյանն ընտրեց Հայկ Մարությանին: Ընտրեց և սխալվեց: Ընտրեց և տապալվեց: Հայկ Մարությանի ընտրությունը հեղափոխության կապիտալի փոշիացման, մսխման ամենացայտուն արտահայտությունն էր: Արդյունքում այսօր Հայկ Մարությանը Երևանի քաղաքապետի պաշտոնում չի կարողանում լուծել անգամ մայրաքաղաքի օպերատիվ կառավարմանն առնչվող տարրական խնդիրներ:

Երևանի քաղաքապետարանի տապալված աշխատանքն, ի դեպ, վառ օրինակն է այն բանի, որ պետական կառավարման համակարգը ձախողված է եղել ոչ միայն անցյալում՝ ինչպես իր հայտնի լայվում ներկայացնում էր Նիկոլ Փաշինյանը, այլ այն ձախողված է նաև այսօր:

Ձախողված է ամբողջությամբ նոր, անցած տարվա ընտրությամբ ձևավորված քաղաքային իշխանությունը, որը որևէ օրգանական կապ չունի նախկին համակարգերի, անցյալի հետ:

Նիկոլ Փաշինյանի աշխատանքային հանդիպումը Հայկ Մարությանի հետ գուցե վարչապետին որոշակի վարկանիշային օգուտներ բերի, եթե, իհարկե, աղբահանության վիճակը գոնե փոքր-ինչ բարելավվի: Սակայն այդ վարկանիշային օգուտները ոչինչ են այն իրողության համեմատ, որ Հայաստանում համակարգերը չեն կարողանում բնականոն գործել, որ ցանկացած, անգամ ամենափոքր, հարց պահանջում է վարչապետի միջամտությունը: Սա լրջագույն քաղաքական խնդիր է, որը շարունակվելու դեպքում ունենալու է շատ ավելի վատ հետևանքներ: Երբ բոլոր խնդիրները երկրում լուծվում են միայն վարչապետի միջամտության դեպքում, անկախ վարչապետի պաշտոնը զբաղեցնող անձից՝ դա կարող է հանգեցնել անձնիշխանության արմատավորման: Որովհետև անձնիշխանության դրսևորում է այն իրողությունը, երբ բոլոր որոշումները կայացվում են մեկ անձի կողմից: Այդ դեպքում ժողովրդավարության տարրական բնորոշիչներ համարվող իշխանության ապակենտրոնացումը, հակակշիռները, համակարգերը դառնում են ֆիկցիա՝ ստանձնելով սոսկ ցուցափեղկային նշանակություն:

Ի դեպ, գրեթե նույնական էր իրավիճակը նաև Սերժ Սարգսյանի իշխանության դեպքում: Ֆորմալ առումով առկա էին ժողովրդավարական բոլոր ինստիտուտներն ու հաստատությունները, սակայն բոլոր որոշումները կայացնում էր Սերժ Սարգսյանն անձամբ: Ինչի հանգեցրեց դա՝ ամենալավը գիտի Նիկոլ Փաշինյանը: Գուցե նաև՝ Հայկ Մարությանը:

Նհութի սկզբնաղբյուրը՝ 1in.am