Աղտոտված արագիլներն անխուսափելիորեն անկում էին ապրելու, քրգործ է հարուցվել
Արագիլների աղտոտման դեպքով նյութերը հավաքել ենք, ուղարկել ենք իրավապահներին, հարուցվել է քրեական գործ։ Այս մասին News.am-ի հետ զրույցում ասել է Բնապահպանության եւ ընդերքի տեսչական մարմնի Կենդանական աշխարհի վերահսկողության բաժնի պետ Արթուր Բեգլարյանը։
Ըստ զրուցակցի՝ արագիլների անկումն անխուսափելի էր, իրենք դա կանխատեսել էին. «Մենք սա որակել ենք էկոլոգիական աղետ, գիտեինք, որ նրանք անկում էին ապրելու։ Արագիլների մի մասը չի կարողանում թռչել, սնունդ հայթայթել և անխուսափելիորեն անկում կապրեին»։
Տեսչական մարմնի ներկայացուցչի խոսքով՝ հնարավոր չի լինում լվանալ արագիլների փետուրները. «Փետուրները մաքրելու գործընթացում վնասվում են թռչունների փետուրները, և արդյունքում ստացվում է նույն վիճակը»։
Հարցին՝ արդյոք հիմնականում Արարատի մարզի Հովտաշեն համայնքում է առկա այս խնդիրը, նա դրական է պատասխանել։
ԳԱԱ կենդանաբանության ինստիտուտի գիտաշխատող Լյուբա Բալյանն այս խնդրի առնչությամբ նշել է, որ 2 ամիս է՝ ահազանգը կա, սակայն որևէ գործնական քայլ պատկան մարմինների կողմից չի իրականացվել իրավիճակը շտկելու համար։ Նման ահազանգ է եղել նախորդ տարիներին ևս, սակայն որևէ արձագանք չի եղել. «Չկազմավորվեց օպերատիվ հանձնաժողով, որ կկարողանար ճիշտ կազմակերպել արագիլների փրկելու աշխատանքները։ Հարցի լուծումը միայն լողացնելը չէ, իրենց պետք էր մի տեղ պահել, կերակրել, քաշի բերել մինչև լողացնելը, ոչ թե միանգամից բռնել ու տանել, այսպիսի սթրեսային պրոցեսների ենթարկել։ Պետք է անասնաբույժ լիներ կամ համապատասխան մասնագետ, որը կզններ արագիլներին, կհասկանար՝ պետք է լողացնել, թե ոչ»։
Թեև Հովտաշեն համայնքն է ուշադրության կենտրոնում հայտնվել, սակայն խնդիրը կա նաև այլ համայնքներում. «Արագիլները, որոնք համայնքից դուրս են, անուշադրության են մատնված, որևէ մշտադիտարկում, վերահսկողություն չի իրականացվում։ Մենք բնակավայրից դուրս որքան շրջեցինք, այն արագիլները, որոնք գրանցված էին, մենք նրանց չենք տեսնում, որը շատ վատ ահազանգ է»։
Կենդանաբանության ինստիտուտի գիտաշխատողը մտահոգված է ոչ միայն աղտոտված արագիլների առնչությամբ, այլ նաև նրանց ձագերի, քանի որ այն ժամանակը, որ պետք է անցկացնեին հասուն առանձնյակների հետ, չեն անցկացրել և «կյանքի դասեր չեն քաղել»։
Հիշեցնենք, տևական ժամանակ է՝ քննարկվում է, որ Արարատի մարզի Հովտաշեն համայնքի տարածում ապրող արագիլներն աղտոտված են ու չեն կարողանում թռչել։
Ըստ նախնական տեղեկությունների` արագիլներն աղտոտվել են Հրազդան գետը լցված արտադրական թափոններից։ Ջրային կոմիտեն հայտարարություն էր տարածել, որ Հրազդան գետի տարածքում` Սիս համայնքից եկող բաց դրենաժային ցանցում, Սիս-Նորամարգ- Ռանչպար համայնքների խաչմերուկում, կամրջի տակ, աղբի իսկական պահեստ է հայտնաբերվել. «Աղբի կուտակմանը նպաստում է նաև «Նաիրիտ» գործարանից եկող և դրենաժին հատվող խոշոր տրամաչափի չգործող խողովակը։ Իսկ կուտակված աղբի մեջ գերակշռողը ձկնաբուծարաններից եկող ճարպոտ թափոններն են, որոնք էլ, ի դեպ, վերջին օրերին պատուհաս են դարձել տարածքի արագիլների համար»։