Ատամբաևին ցմահ ազատազրկում է սպառնում
Ղրղզստանի նախկին նախագահ Ալմազբեկ Ատամբաևին, ում մեղադրում են սպանության եւ այլ առանձնապես ծանր հանցագործությունների մոջ, կարող է սպառնալ ցմահ ազատազրկում, «ՌԻԱ Նովոստի»-ին հայտնել է իրավապաշտպան Ռիտա Կարասարտովան:
Երեքշաբթի երկրի գլխավոր դատախազության ներկայացուցիչը հայտնել էր, որ նախկին նախագահ Ալմազբեկ Ատամբաևին հանձնվել է մի շարք առանձնապես ծանր հանցագործությունների ծանուցում, ինչպիսին են զանգվածային անկարգությունների կազմակերպումը, սպանությունը, սպանության փորձը, պատանդներ վերցնելը և իշխանության ներկայացուցչի նկատմամբ բռնության կիրառումը: Հատուկ ծառայությունների վարկածով՝ պետության նախկին ղեկավարը պետական հեղաշրջում էր նախապատրաստում:
«Չպետք է իրավաբան լինել հասկանալու համար, որ նման առանձնապես ծանր հոդվածների հանրագումարով Ատամբաևին կարող է սպառնալ ցմահ ազատազրկում»,- հայտարարել է նա:
Իրավապաշտպանի խոսքով՝ ինքը դեռևս պատրաստ չէ Ատամբաևին առաջադրված նոր մեղադրանքները գնահատելու, քանի որ դրանց հիմնավորվածությունը պետք է հաստատեն քննությունն ու դատարանը: «Սակայն բոլորս հիմա տեսնում ենք, որ իշխանությունների և Ազգային անվտանգության պետական կոմիտեի կողմից ուղղակի տեղի է ունենում «մանեկների պտտում»: Փակում են հեռուստաալիքները, մարդկանց ձերբակալում են միայն այն բանի համար, որ ապրում են Կոյ-Տաշ գյուղում, որտեղ տեղի են ունեցել բախումները: Եվ այս ամենը սկսել է Ատամբաևն ինքը, երբ երկրի նախագահն էր: Նա հիմա պարզապես հավաքում է սեփական քաղաքականության պտուղները»,- շեշտել է նա:
Հիշեցնենք, Ղրղզստանի դատախազությունը հանդես էր եկել հայտարարությամբ, թե հատուկջոկատայինի մահը Ատամբաևի ձեռքի գործն է: