«Ի՞նչ ես կապիկություն անում». Համբարձումի դերը մարմնավորող Էմիլ Գալստյանը պատմում է երեկ տեղի ունեցած միջադեպի մանրամասները
Հյուսիսային պողոտայում հանդիպման էի, մինչ ընկերս կգար, նկատեցի, որ ինչ-որ ստորագրահավաք է, հետաքրքրեց, մոտեցա, հարցրեցի, թե ինչի հետ է կապված ստորագրահավաքը, ստացա ոչ ադեկվատ և կոպիտ պատասխան մի քանի հոգուց, որոնք, ըստ երևույթին, կապ ունեին այդ ամենի հետ։ Այս մասին News.am լրատվականի հետ զրույցում պատմել է դերասան Էմիլ Գալստյանը՝ անդրադառնալով երեկ՝ ժամը 9.30–ի սահմաններում Հյուսիսային պողոտայում «Ստամբուլյան» կոնվենցիայի դեմ իրականացվող ստորագրահավաքի կազմակերպիչների և իր միջև ունեցած միջադեպին։
«Բնականաբար, համարժեք պատասխան տվեցի ինձ անհարգալից վերաբերմունքի համար։ Մասսայական, այնուհետև 3 հոգով ինձ հարվածներ հասցրեցին, մարդկանց աչքի առաջ գցեցին գետնին։ Ոստիկանությունը հասցրեց միջամտել, բոլորին տեղափոխեցին բաժին։ Եթե ոստիկանությունը չմիջամտեր, հնարավոր է՝ ավելի շատ վնասներ հասցնեին»,–նշեց նա։
Դերասանի խոսքով՝ հարցրել է ինչ ստորագրավաք է, ինչին ի պատասխան կազմակերպիչները, մասնավորապես, նշել են. «Ի՞նչ ես կապիկություն անում, իբր չգիտես ինչ ստորագրահավաք է»։
Նա շեշտում է՝ ինչի պետք է հարցներ, եթե տեղյակ լիներ, թե ինչ ստորագրահավաք էր. «Եթե իմանայի, ինչի՞ պիտի հարցնեի, կամ եթե դերասան եմ, ուրեմն կապիկ եմ։ Ի՞նչ բարոյական իրավունք ունեն իմ հասցեին այսպես արտահայտվելու»։
Ավելի վաղ Operativ լրատվականը հաղորդել էր, որ Հյուսիսային պողոտայում երեկ՝ օգոստոսի 12–ին միջադեպ է տեղի ունեցել «Բանակում» սերիալից հայտնի Էմիլ Գալստյանի եւ «Ստամբուլյան» կոնվենցիայի դեմ իրականացվող ստորագրահավաքի կազմակերպիչների միջեւ։ Մեր տեղեկություններով՝ քաշքշուկ է տեղի ունեցել, ինչից հետո Էմիլը դիմել է իրավապահներին։
Հիշեցնենք, Էմիլ Գալստյանը հայտնի Բանակում սերիալում մարմնավորում էր Համբարձումի դերը: