ԱԺ աշխատակիցը կստենդավորվի հիմա. ԱԺ-ում բո՞ւնտ է հասունանում

ԱԺ աշխատակազմում կատարվող կառուցվածքային փոփոխությունները երկար ժամանակ շարունակում են մթնոլորտը լարված պահել խորհրդարանի ներսում: Եվ այսօր այդ լարվածությունը պայթել է ԱԺ աշխատակազմի ղեկավարների ու աշխատակիցների միջև լուրջ միջադեպով: Ինչպես տեղեկացնում է hraparak.am-ը, բանը հասել է շտապ օգնության մեքենա կանչելուն: Սրտի սուր ծակոցներով շտապօգնության մեքենայով հիվանդանոց է տեղափոխվել Հեռահաղորդակցման բաժնի ղեկավար Սասուն Պետրոսյանը:

Սասուն Պետրոսյանին այս պահին ստենդավորում են, այս մասին 168.am-ին փոխանցեցին աշխատակիցներից: Ճշտող հարցին՝ սրտի կաթվաած ստացե՞լ է Սասուն Պետրոսյանը, թե՞ բժիշկներին հաջողվել է կանխել այն, պատասխանեցին՝ լրացուցիչ տեղեկատվության չեն տիրապետում:

Նշենք, որ մինչ այդ, միջադեպից առաջ նա եղել է ղեկավարի կաբինետում, իր անհամաձայնությունն է հայտնել առաջարկվող փոփոփոխություններին առ այն, որ բաժնի պետի հաստիքից իրեն իջեցում է առաջարկվել:

Մասնավորապես՝ առաջարկվել է դառնալ առաջին կարգի մասնագետ կամ լքել աշխատակազմը: Մինչդեռ Սասուն Պետրոսյանն ԱԺ նստաշրջանին ապահովում է հեռահաղորդակցման ողջ տեխնիկական մասը՝ մոնիտորից քվեարկություն և զուգահեռ մի շարք աշխատանքներ, և նա, ըստ աշխատակիցների, այս պահի դրությամբ փոխարինող չունի, իսկ այդ ծավալի աշխատանքը, այն էլ՝ նման համակարգված ձևով, ասում են՝ դժվար թե ուրիշ մեկն այդքան հեշտությամբ սերտի և կատարի առանց խաթարումների:

Ավելին, նրանց խոսքով՝ Սասուն Պետրոսյանը համարվում էր հներից մեկը, ուստի նորերի կողմից նա ընկալվել է շարքային սև-սպիտակ բաժանումների հոգեբանական կոնտեքստում:

Աշխատակիցներից ոմանք մեզ հետ զրույցում չբացառեցին, որ այս դեպքով ընդվզումների մեծ ալիք կբարձրանա: ԱԺ մեր աղբյուրի փոխանցմամբ՝ աշխատակազմը բունտ անելու ծրագիր է պլանավորում, վիճարկում են միայն ժամկետները՝ բողոքի ցույցերն անցկացնել հանգստյա՞ն սեզոնին, թե՞ սպասել աշնանային նստաշրջանի մեկնարկին, որպեսզի օրենսդիրներից նաև աջակցություն ստանան:

Աշխատանքից հեռացված մի խումբ աշխատակիցներն այս օրերին հանդիպել են փաստաբանական ծառայություն իրականացնող ընկերությունների, մեզ հայտնի դարձած անձանց թիվը 18-ն է: Նրանք բոլորը համարում են, որ ԱԺ հեղափոխական ղեկավարությունն իրենցից ազատվելու համար է կառուցվածքային փոփոխությունների մոտիվացիան ընտրել և այսօր էլ անում է հնարավորը, որ կրճատման տակ ընկածներին չփոխհատուցի օրենքով սահմանված երկու ամիսների լրիվ աշխատավարձը, իսկ դա պարտավոր է անել ԱԺ աշխատակազմի ղեկավարությունը միայն այն պատճառով, որ, ինչպես հարկն է՝ պատշաճ ծանուցումներ չի ապահովել կրճատումներից 2 ամիս առաջ:

Բացի այդ, մի շարք պետական դասի աշխատողներ, ինչպես գրել էինք մեր նախորդ հրապարակման մեջ՝ արհեստականորեն կանգնեցվել են փաստի առաջ, նրանց էլ, ի դեպ, իրենց դասային աստիճանից ցածր այլ հաստիք է առաջարկվում, իսկ որպեսզի հրաժարվածները չհայտնվեն կադրային ռեզերվում, և օրենքով սահմանված կարգով պետությունը չպարտավորվի նրանց վճարել ռեզերվում գտնվելու 6 ամիսների լրիվ աշխատավարձը, ԱԺ աշխատակազմի ղեկավարությունն այս դեպքում էլ «քցոցի անելով»՝ մանիպուլյատիվ լուծում է գտել: Նրանց բոլորին հետ է կանչում, ֆորմալ առաջարկում է այլ հաստիքում պաշտոնավարել և մինչև երկու ամիս ժամանակահատվածում մասնակցել մրցույթի. ահա այս համաձայնությունը ստանալով՝ ԱԺ աշխատակազմի ղեկավարը «մի ձեռքով երկու ձմերուկ է բռնում»:

Մի կողմից՝ մրցույթով դարձյալ լեգալացնում է այդ կադրերից ազատվելու կամ նրանց այլ հաստիքում հաստատելու հնարավորությունը, մյուս կողմից՝ փրկվում է պետծառայողին դուրս թողնելու և նրանց կադրային ռեզերվում մնալու 4 ամիսների աշխատավարձը տալու պարտավորությունից:

Արարատ Միրզոյանի ստորագրած փաստաթուղթը խմբագրվում է ամեն օր:

168.am-ը գրել էր, որ ԱԺ-ում գիտակրթական կենտրոն ստեղծելու գաղափարի քողի տակ կադրային լուրջ ջարդ է իրականացվում, նաև դերերի փոխատեղումներ կլինեն, աշխատակազմի կառուցվածքային փոփոխություններից հետո օրենսդրի օրինաստեղծ ֆունկցիան կդառնա ոչ թե պատգամավորի պարտականությունը, այլ կվերապահվի միջազգային փորձագետների:

Խոսվում է այն մասին, որ նոր փոփոխությունների համաձայն՝ Օրենսդիրում կկրճատվեն հատկապես պետծառայողների հաստիքները՝ փոխարենը կներմուծվեն օտարերկրացի մասնագետներ:

Այսինքն՝ հապճեպ վերակառուցման գործընթացի իմաստը հենց դա պիտի լինի, միջազգային փորձագետները կլծվեն օրինաստեղծ գործին, իսկ պետական ծառայողները, որոնք դասային աստիճան, պետական համակարգի կառուցվածքային գիտելիքներ, պրոֆեսիոնալիզմ ունեին, կդառնան հպարտ գործազուրկ քաղաքացիներ:

Իսկ ԵՄ-ից ներմուծվող նոր կադրերը, ինչպես աղբյուրն է վստահեցնում, ԱԺ-ի հետ քաղիրավական պայմանագրով կգործակցեն, նրանք ենթադրաբար եվրոպական երկրներից կներբեռնեն պահանջվող օրինագծերը և կպրոյեկտեն հայկական իրականության վրա, իսկ ժողովրդի ընտրյալ պատգամավորի անելիքը կսահմանափակվի կոճակի սեղմումով: Ընդգծենք, ֆորմալ գործառույթը սպառնում է հատկապես իշխող ուժի խորհրդարանական խմբակցության պատգամավորներին, նրանց ամեն անգամ կփոխանցվի նախագիծը, կստանան հանձնարարականը, և, ըստ այդմ, կսեղմեն «կողմ» հաստատող կոճակը՝ դակիչ ֆունկցիայով հաստատելով օրինագիծը: Եվ ենթադրվում է, որ այսպես պարբերաբար օրինագծերի փնջեր կհաստատվեն ու կմտնեն մեր կյանք, որոնք կառնչվեն անցումային արդարադատությանը, չարչրկված վեթինգի ինստիտուտի ներդրմանը, լրատվամիջոցներին և գործարար միջավայրին սանձահարող դրույթներին, աղմկահարույց ստամբուլյան կոնվենցիային, գույքահարկի ոչ ողջամիտ բարձրացմանը, մարիխուանայի օրինականացմանը, Սահմանադրությունը փոխելուն, բանակին և էլի մի շարք կարևոր ոլորտների:

Այսինքն՝ ուրիշի ձեռքով կարված զգեստը կփորձեն հագցնել բոլոր ոլորտներին, ու այստեղ անելիք չի ունենա պետական ծառայողը, քանի որ Արարատ Միրզոյանի ստորագրած և հուլիսի 15-ին ուժի մեջ մտած կառուցվածքային փոփոխության փաթեթը, որ մինչ այս պահը գաղտնի է պահվում, ըստ էության մի խնդիր է լուծում՝ ազատվել վտանգավոր համարվող նախկինների կադրերից և որոշիչ դիրքերից իզոլյացնել պետական ծառայողին՝ նրան թողնելով արարողակարգի, քարտուղարության և արտաքին կապերի վարչությունները:

Իսկ պետծառայողի ինստիտուտը պետական կառավարման համակարգում շարունակականության կարևորագույն գործառույթն է ապահովում, հասարակության այս շերտը համարվում է ինտիտուցիոնալ կառուցակարգերի հիշողության հիմնական կրողը, համակարգի շարժիչ ուժը, ուստի նրանք համակարգը պիտի զերծ պահեն քաղաքական վերադասավորումներից, քաղաքական կատարողների քմահաճույքներից, մինչդեռ այս դեպքում հակառակն է ստացվում: Քաղաքական իշխանության փոխված տերերն առաջինը հենց պետական կառույցների հնաբնակներին թիրախավորեցին:

Լրատվամիջոցներից մեկը՝ հղում անելով ԱԺ ղեկավարության իր աղբյուրին, այս փոփոխությունները ֆինանսական էր համարել՝ ընդգծելով, որ Եվրամիության փորձագետների բարձր աշխատավարձերը հենց ԵՄ-ն էլ կփոխանցի:

Ստացվում է՝ ԱԺ աշխատակազմի մոդեռն մղումների ենթատեքստում միանգամից երկու նպատակ է դրված՝ պետական այս հաստատությունում դրսից մասնագիտական խմբեր ներմուծել, հետո ասել, թե ԱԺ պահպանման ծախսերի կրճատում ենք արել, մյուս կողմից՝ Օրենսդրի ոչ հմուտ պատգամավորներին պրոֆեսիոնալ փորձագետների խմբեր կցել, ու դրա ծախսերի բեռը մասնակի տեղափոխել ԵՄ դաշտ:

Ի դեպ, այս մոտեցումն ԱԺ աշխատակազմի ղեկավարությունը տոտալ փոփոխություն է համարում, գիտակրթական նոր կենտրոնի հենքի վրա կտրուկ փոխել են նաև հաստիքներից բխող աշխատանքների նկարագիրը, այնպես, որ կադրային հին ռեզերվի հմտությունների հետ հանկարծ չհամընկնեն:

Նկատենք, այս օրերին մամուլը պարբերաբար անդրադառնում է այս կրճատումներին, սակայն աշխատակազմից հնչող դժգոհություններին, չգիտես ինչ տրամաբանությամբ, անհաղորդ է մնում ԱԺ աշխատակազմի ղեկավարությունը:

Հիշեցնենք, խնդիրը միայն կադրային կրճատումները չեն, օրակարգում պետծառայողների քանակի կրճատումն է, գաղտագողի խմբագրվող անվանացանկն և հաստիքացուցակը, նոր կառուցվածքը մինչ այս պահը չհրապարակելը, կրճատվող հաստիքների մասին աշխատողների չծանուցված լինելը և, վերջապես, մարդկանցից հերթով ազատման դիմումներ պահանջելու ժամկետների խախտումը, ինչն արվում է արձակման նպաստներ չփոխանցելու համար: Թվարկված դեպքերը վկայում են խախտված իրավունքների մասին:

Բազմիցս գրվել է, որ ԱԺ աշխատակազմի ղեկավարը մինչև վերջին պահը թաքցնում է անվանական հաստիքացուցակը, այն վավերացումից հետո շրջանառվում է, թերևս, միայն ցանկալի թեկնածուների շրջանում, որպեսզի ամեն մեկն իր հաստիքն ընտրի, վերջում մնացած թափուր տեղերի համար նոր միայն մրցույթ կհայտարարվի:

Ի դեպ, այս մոտեցումը մեզ հետ զրույցում չթաքցրեց նաև ԱԺ աշխատակազմի ղեկավար Տիգրան Գալստյանը: Ավելին, պաշտոնյան հայտնեց նաև՝ ԱԺ խորհրդի հաստատած կառուցվածքը, որն ուժի մեջ է արդեն հուլիսի 15-ին՝ ԱԺ նախագահ Արարատ Միրզոյանի ստորագրությամբ վավերացնելուց հետո, մինչ այս պահը լրացուցիչ ճշգրտումների է ենթարկվում, այլ կերպ ասած՝ դեռ վերջնական չէ, հաստիքացուցակը դեռ խմբագրվում է:

Ստացվում է՝ Արարատ Միրզոյանը ստորագրել է մի փաստաթուղթ, որը չի կարդացել մինչև վերջ, կամ էլ այն ստորագրման պահին ամբողջական տեսք չի ունեցել, հակառակ դեպքում ԱԺ խորհուրդն այս կիսատ-պռատ սցենարի գործարկման համար, հասկանալի չէ՝ ինչո՞ւ է այսքան շտապողականություն դրսևորում, ինչո՞ւ է խորհրդավոր հաստիքացուցակն այսքան ժամանակ դեռ թաքցվում ղեկավարության կողմից:

Եվ զավեշտալին այն է, որ հուլիսի 15-ից կրճատված հաստիքների տերերն աշխատում են մինչ օրս, ավելի ճիշտ՝ ներկայանում են ԱԺ՝ աշխատանքի, իսկ թե ինչ իրավահարաբերությունների հիմքի վրա է կարգավորվում նրանց աշխատանքը գործատուի հետ, շատ մեծ հարցականի տակ է:

Օրենսդրի հեղափոխական ղեկավարության համար առաջնայինն ԱԺ աշխատակազմում նոր՝ մոդեռն քաղաքականություն իրականացնելն է, որտեղ գլխավոր դերակատարները ներմուծվող միջազգային փորձագետները պիտի լինեն:

Ի դեպ, այդքան հորջորջած ԱԺ գիտակրթական կենտրոն ասվածը, հնարավոր է, տեղակայվի ԱԺ-ի նոր մասնաշենքում, որտեղ հիմա գործում էԱԺ հաշվեքննիչ պալատը:

Սյուզի Բադոյան

168.am