Նույնսկ վարչապետին չեմ դիմել, էս ինչ կառավարություն է, ինչ երկիր է. 8 ամիս անց մահացած զինծառայողի գործով ոչ մի նորություն չկա
Հունվարի 1-ին հրազենային վնասվածքից մահացած պայմանագրային զինծառայող Էդգար Գրիգորյանի գործով 8 ամիս անց դեռ ոչ մի նորություն չկա: NEWS.am-ի հետ զրույցում ասաց Էդգարի մայրը՝ Ալինա Սարգսյանը:
«Ես այս ամբողջ ընթացքում ոչ մեկին չեմ դիմել, բայց ոչ մի նորություն չկա, գործը տեղից չի շարժվում։ Էնքան լավ ղեկավար ունենք, որ ամեն օր զինվորների, զինծառայողների մահվան մասին ենք լսում: Ես դեռ լուռ սպասում եմ` տեսնեմ ինչ է լինելու այս գործի վերջը: Նույնսկ վարչապետին չեմ դիմել, քանի որ հույս չունեմ, էս ինչ կառավարություն է, ինչ երկիր է, բոլորն առնետներն են»,- ասաց նա:
Տիկին Ալինան նշեց, որ քննչականից իրեն միայն հայտնել են, որ հեռախոսազանգերն են վերծանել դեպքից 8 ամիս անց:
Մահացած զինծառայողի մայրը ասաց, որ միայն երեխաների թոշակի հարցն է լուծվել, 3 անչափահաս երեխաները ամսական 120 հազար դրամ թոշակ են ստանում:
Հիշեցնենք, որ Ամանորի գիշերը հրազենային վնասվածքից մահացել է ՀՀ ՊՆ պայմանագրային զինծառայող Էդգար Գրիգորյանը, սակայն դեպքի մասին Պաշտպանության նախարարությունն ու Քննչական կոմիտեն որևէ տեղեկություն չէին հայտնել:
Պնախարար Դավիթ Տոնոյանն հայտարարել էր, որ Պաշտպանության նախարարությունը չի պատրաստվում ոչ ծածկել, ոչ կոծկել որևէ տեղեկատվություն, և դա չի արել տարիներ շարունակ:
«Հիմա փոքրիկ ծառայողական քննություն է իրականացվում՝ պարզելու, թե ինչի հետ է կապված եղել, որովհետեւ հաշվի առնելով, որ դեպքը կապված չի եղել ծառայության հետ, մենք մեծ ուշադրություն չենք դարձրել այդ խնդրին»,- հավելել էր նա:
ՊՆ-ից հայտնել են, որ դեպքի առթիվ Քննչական կոմիտեում հարուցվել է քրեական գործ ՀՀ ՔՕ-ի 110-րդ հոդվածի 1 մասով՝ ինքնասպանության հասցնելը: