Մարալիկի բամբակամանվածքային գործարանն ամսական 300 տոննա թել կարտադրի. նախարար
Մարալիկում այսօր` օգոստոսի 10-ին, բացված բամբակամանվածքային գործարանն ամսական կարտադրի 300 տոննա թել: Այս մասին լրագրողների հետ զրույցում ասաց ՀՀ Էկոնոմիկայի նախարար Տիգրան Խաչատրյանը:
«Իրենք ասացին, որ պատրաստ են ներդրումներ անել այնքան, որքան կպահանջվի, այսինքն՝ ներկայումս նախատեսում են էս արտադրության շրջանակում ամսական 300 տոննա թել արտադրել` վստահ լինելով, որ դրա իրացումը Հայաստանում երաշխավորված է: Սա համակարգաստեղծ ձեռնարկություն է, այսինքն` ինքը այն կարեւոր օղակն է, որ իր շուրջը կարող են առաջանալ նոր փոքր արտադրություներ»,- ասաց նա:
Նախարարը նշեց, որ գործարանը հագեցած է նոր ներկրված ժամանակակակից սարքավորումներով, եւ կարեւորն այն է, որ արտադրողը պատկերացում ունի` որտեղ է իրացնելու արտադրանքը:
Տիգրան Խաչատրյանը նաեւ հավելեց, որ Կառավարությունը նման տեսակի նախաձեռնություններին 2 ձեւով է աջակցում. եթե մեկնարկի ժամանակ նախատեսված է ավելացված արժեքի հարկ, ապա հետաձգում են այդ վճարումը, եթե կան մաքսատուրքեր, որից հնարավոր է ազատել, ապա ազատում են այդ մաքսատուրքից, որպեսզի նրանք կատարեն հնարավորինս քիչ ծախսեր, տնտեսեն միջոցներ եւ լինեն արդյունավետ:
Հիշեցնենք, ավելի վաղ Operativ լրատվականը հայտնել էր, որ Մարալիկում գործարանի բացման հանդիսավոր արարողությանը մասնակցում է ՀՀ վարչապետ Նիկոլ Փաշինյանը, Շիրակի մարզպետ Տիգրան Պետրոսյանը:
Գործարանի համասեփականատեր Գևորգ Գասպարյանն էլ լրագրողներին ասել էր, որ Մարալիկում բամբակամանվածքային գործարանն այս պահին ունի մոտ 150 հոգի աշխատող, ընդլայնվելուց հետո միջին աշխատավարձը 297 հազար դրամ է լինելու: