Մարալիկում բամբակամանվածքային գործարանն այս պահին ունի մոտ 150 հոգի աշխատող, ընդլայնվելուց հետո միջին աշխատավարձը 297 հազար դրամ է լինելու. գործարանի համասեփականատեր
Մարալիկում բամբակամանվածքային գործարանի արտադրանքը մատակարարվելու է «Տավուշ ձեռնոց» ընկերությանը: Այս մասին այսօր` օգոստոսի 10-ին, լրագրողների հետ զրույցում ասաց գործարանի համասեփականատեր Գևորգ Գասպարյանը: Նշենք, որ գործարանի համասեփականատեր է նաև շվեյցարահայ հայտնի գործարար, «Ֆրանկ Մյուլլեր» ապրանքանիշի սեփականատեր Վարդան Սըրմաքեշը:
«Գործարանի խնդիրը թելի արտադրության նախնական փուլն է, ամբողջ տեքստիլի հիմքն է համարվում թելը: Եթե հիմա գործարանն ամբողջ հունով աշխատի, ինքն իր շուրջը կհամախմբի ավելի փոքր գործարանների, որոնք կսկսեն աշխատել և հսկայական թվով աշխատատեղ կապահովվի, ինքը կլաստերի պես իր շուրջը կհամախմբի ամբողջ տեքստիլը: Այսօր մեր հիմնական թիրախային գնորդը «Տավուշ ձեռնոցն» է, որը հումքը արդեն երկար տարիներ ներմուծում է արտերկրից: Մենք վերջապես կազատվենք արտերկրի կախվածությունից: Արտադրանքի մեծությունը հասնում է ամբողջ Սովետական միությունում արտադրվածի չափին, այսինքն` տեխնոլոգիաներ են փոխվել, նոր տեխնոլոգիաները թույլ են տալիս, որ ավելի արագացված ու հեշտ լինի արտադրանքի ստացումը»,- ասաց նա:
Համասեփականատերը նշեց, որ գործարանում միջին աշխատավարձը 297 հազար դրամ է լինելու, սակայն մասնագետի խնդիր կա, փորձում են նաև երիտասարդ մասնագետներ ներգրավվել:
Գևորգ Գասպարյանը նշեց, որ իրենք Կառավարությունից ունեն 13 մլն դրամի արտոնություն, նախատեսվում է նաև ընդարձակել գործարանի տարածքը և բամբակյա նոր ատադրանք արտադրել:
Գործարանն այս պահին ունի մոտ 150 հոգի աշխատող:
Հիշեցնենք, որ գործարանի բացման հանդիսավոր արարողությանը մասնակցում է ՀՀ վարչապետ Նիկոլ Փաշինյանը, Շիրակի մարզպետ Տիգրան Պետրոսյանը: