Այդ ամենը եղել է Սերժի ժամանակ, հիմա այլ ժամանակներ են եկել. Էդմոն Մարուքյան

Մարզերում գործող բոլոր իրավապահ մարմինները մարզպետի հետ համագործակցում են, մարզպետն ասում է՝ էս գյուղապետի գործերն ուսումնասիրեք, ուսումնասիրում են ու քրեական գործ հարուցում։ Այս մասին այսօր՝ օգոստոսի 9-ին «#bRightTalk՝ Դավիթ Խաժակյանի հետ» նոր ֆորմատով ֆեյսբուքյան հարցազրույցի ժամանակ ասաց ԱԺ «Լուսավոր Հայաստան» խմբակցության ղեկավար Էդմոն Մարուքյանը։

«Երբ Սերժի ժամանակ սկսվեց համայնքների խոշորացումը, մենք ասում էինք՝ բա էդ մարդկանց կարծիքը հարցնո՞ւմ եք։ Գյուղում ապրող մարդն ասում է՝, եթե իմ կարծիքը հարցնում եք, ես ասում եմ՝ դեմ եմ, ու հետո դուք խոշորացնում եք, դա նշանակում է, որ դուք թքած ունեք իմ կարծիքի վրա։ Մարդը մտածում է՝ ընտրական ինստիտուտը դեգրադացվում եւ նսեմացվում է, քանի որ գնացինք դեմ քվեարկեցինք հանրաքվեի ժամանակ, բայց Կառավարությունը որոշեց, որ մեր համայնքը միացնի կողքի համայնքին»,- ասաց Մարուքյանը։

Նա վստահեցրեց, որ գյուղերում այցերի ժամանակ գյուղապետերն ու բնակիչները միշտ բողոքել են, որ դեմ են համայնքների խոշորացմանը, եւ կարիք կա իրենց կողքին կանգնելու.

«Այդ ամենը եղել է Սերժի ժամանակ, հիմա այլ ժամանակներ են եկել, եւ «Նոր Հայաստանում» գաղտնի են պահվում ցանկերը, թե որ համայնքները պետք է խոշորացվեն։ Մարզպետները գյուղապետերին կանչում են իրենց մոտ ու ասում, որ համայնքը խոշորացնեն, սակայն գյուղապետներն ասում են, որ դեմ են, ինչին ի պատասխան՝ մարզպետներն ասում են, թե՝ դեմ-մեմ չգիտեմ, գնացեք ու խոշորացրեք, սա Նոր Հայաստանում» է արվում»։

Մարուքյանը նկատեց, որ եւ հեղափոխության, եւ Երեւանի քաղաքապետի ընտրություն ժամանակ ասվում էր, որ համայնքները խոշորացնելուց առաջ հարցնելու են ժողովրդի կարծիքը, սակայն ժողովրդի կարծիքը հաշվի չեն առնվում.

«Մի կողմից՝ այդ հանրաքվեի խնդիրը, մյուս կողմից էլ՝ այն, որ ընտրվել, սակայն ժողովրդի կարծիքը հաշվի չեն առնում։ Հիմա թող գնան, հանրաքվե անեն ու հասկանան, թե գյուղերում մարդիկ ինչ կարծիք ունեն։ Մարդկանց կամքին հակառակ որեւէ պրոցես որ արվեց, դա ի ծնե բարուրի մեջ մեռած գործընթաց է, այսինքն՝ այդ խոշորացումն արդյունք չի տալու»։

Մարուքյանն առաջարկեց դիտարկել՝ ՀՀ երրորդ նախագահ Սերժ Սարգսյանի ժամանակ խոշորացված համայնքներում ինչ լավ բան է տեղի ունեցել, եթե եղած արդյունքը բացասական է, գյուղերը դատարկվում են, ոչինչ չի փոխվել, ուստի պետք է մեծ լսումներ անցկացվեն եւ եղած բոլոր խնդիրները վեր հանվեն։

Նա ընդգծեց, որ այսօր Հայաստանում մարզպետական համակարգն ամենաարատավոր ինստիտուտն է, եւ քանի դեռ այդ համակարգը կա, ապա Հայաստանում չեն կարող լինել արդար ընտրություններ.

«Եթե այդ համակարգը մնա, ապա մյուս ընտրությունների ժամանակ «Իմ քայլը» դաշինքի կամ «Քաղաքացիական պայմանագրի» մարզպետներն ունենալու են լուրջ դերակատարում։ Ոչ թե նրա համար, որ իրենք ռեյտինգով տղերք են, այլ իրենք ժողովրդի վրա սուբվենցիան ծախող են, կասեն՝ վարչապետի հետ այս սուբվենցիան բերեցինք ու այստեղ ասֆալտ արեցինք, ուստի պետք է ընտրեք մեզ։ Դե մեր ժողովուրդն էլ անշնորհակալ չէ, դրա համար էլ կընտրեն, իրենք հո չե՞ն մտածի, թե այդ ամենն արվել է մարդկանցից հավաքած հարկերի հաշվին։ Այս ամենը ժողովրդի վրա ծախում են՝ որպես իրենց կողմից տրվող բարիք։ Հանրապետականն այդպես է պահել մարզպետական համակարգը, եւ այսօրվա իշխանությունը նպատակ չունի այդ արատավոր ինստիտուտից հրաժարվել»։

Մարուքյանն ասաց, որ բոլոր իրավապահներն այսօր ենթարկվում են մարզպետներին. «Ասում են՝ Սահմանադրություն փոխենք, խոսակցություն կա՞ մարզպետների ինստիտուտը վերացնելու մասին, այն ներկայիս իշխանություններին «դզել» է։ Հանրապետականն իր մարզպետական ինստիտուտը այդպես է հզոր պահել եւ այսօրվա իշխանությունը մտադրություն չունի այդ ապականված ինստիտուտը փոխելու։ Ընտրովի պաշտոնատար անձինք դողում են մարզպետից։ Համայնքի ղեկավարը վազում է մարզպետի առաջ։ Մարզպետ, որն այդ համայնքում չի բնակվում, էսօր նշանակել են, վաղը կարող է հանեն, համայնքի ղեկավարն էլ նշանակվել է 5 տարով։ Կարող ա գնա, դիմի իրավապահ մարմիններին, մարզում գործող բոլոր իրավապահ մարմինները մարզպետի հետ համագործակցում են եւ մարզպետն ինչ ասում է, այդ մարդիկ անում են։ Մարզպետն ասում է՝ էս գյուղապետի գործերն ուսումնասիրեք, ուսումնասիրում են ու քրեական գործ են հարուցում»։

Մարուքյանը վստահեցրեց, որ, եթե ներկայիս իշխանությունը պետք է «հագնի Սերժ Սարգսյանի համար կարված կոստյումը», ապա իրենք դրա դեմ պայքարելու են, քանի որ չեն կարող մտածել, թե «Սերժն այն լավ չէր հագնում, իսկ Նիկոլը լավ է հագնում»։