«Այ սա է օտար ընկերությունների վրա հույս դրած ապրելը». ավիացիայի հարցերով ՀՀ վարչապետի խորհրդականը՝ «Պոբեդայի» շուրջ ստեղծված խնդրի մասին
Ավիացիոն շուկայում գաղտնիքները երկար չեն մնում որպես գաղտնիք: Եվ ինչ-որ ճանապարհով նրանց հասած RyanAir-ի սուբսիդավորման պահանջներից հետևություն են արել, որ իրենք էլ կարող են պահանջել: Այս մասին իր ֆեյսբուքյան էջում գրել է ավիացիայի հարցերով ՀՀ վարչապետի խորհրդական Հակոբ Ճաղարյանը՝ անդրադառնալով «Պոբեդա» ավիաընկերության հետ կապված լուրերին:
Նրա գրառումը ներկայացնում ենք ստորև.
«էսօր ռուսական լոուքոստեր, բայց իրականում ոչ էդքան լոուքոստ աշխատող «Պոբեդա» ավիաընկերությունը ազդարարել է ձմեռային սեզոնից իր թռիչքների դադարեցման մասին:
Պատճառաբանումը, իբր ավիավառելիքի թերլիցքավորումը, համոզված եմ, հիմնավորված չի:
Կարող եմ եզրակացնել մինիմում երեք տարբերակ`
1. Ավիացիոն շուկայում գաղտնիքները երկար չեն մնում որպես գաղտնիք: Եվ ինչ-որ ճանապարհով նրանց հասած RyanAir-ի սուբսիդավորման պահանջներից հետևություն են արել, որ իրենք էլ կարող են պահանջել:
2. Որոշել են իրենք էլ օգտվեն դեպի Երևան թռիչքներ կատարելու առաջարկներից:
3. Ի՞նչ իմաստ ունի ձմեռվա ցածր սեզոնին էժան գներով տոմս վաճառել, երբ գարնան խոպանի սեզոնին նորից կարող են բացվել ու անել իրենց ալաֆը: Իրենց թվում է, որ իրենց փոխարինող չկա:
Կան էլի բազմաթիվ հիմնավորումներ: Բայց դրանց մասին քիչ ուշ:
Նավթի թերլիցքավորումը չի կարող պատճառ հանդիսանալ:
Նախ` բացի նրանցից ոչ ոք դրա մասին տեղեկություն չի հաղորդել:
Հետո` նրանք Գյումրիյում լիցքավորել են ընդամենը մոտ 3 տոննա նավթ: Էդ ինչքա՞ն պիտի իրենց խաբեին ստանդարտներին համապատասխանող սարքավորումները, որ էդքան զգալի լիներ ազդեցությունը:
Այ սա է օտար ընկերություննեերի վրա հույս դրած ապրելը:
Մնացածը, համոզված եմ, բացատրելու կարիք չկա»:
Հիշեցնենք, ավելի վաղ Operativ լրատվականը հղում կատարելով ՏԱՍՍ գործակալությանը, հայտնել էր, որ «Պոբեդան» ձմեռային սեզոնից դադարեցնում է Հայաստան չվերթները. Գյումրիում վառելանյութի թերլիցքավորում է կատարվում:
Այնուհետև Քաղաքացիական ավիացիայի կոմիտեն հանդես էր եկել հայտարարությամբ, թե՝ «Պոբեդա» ընկերության հետ կապված խնդիրը լուծված է:
Սակայն լուրեր էին շրջանառվում, որ թեև դեռ ձմեռային սեզոն չէ, բայց դեպի Գյումրի որոշ չվերթներ արդեն դադարեցվել են: «Պոբեդա» ընկերությունից հայտնել են, որ դեպի Գյումրի ոչ մի չվերթ առայժմ չի չեղարկվել: