Իրենց պապայի տեղ չդնեն՝ որոշեն, ով ունի իրավունք առաջադրվելու․ Արայիկ Հարությունյան
Արցախի Հանրապետությունում չի լինելու միասնական թեկնածու, չկա այդպիսի բան։ Այս մասին այսօր՝ օգոստոսի 6-ին, լրագրողների հետ հանդիպմանը հայտարարեց Արցախի «Ազատ հայրենիք» կուսակցության նախագահ, 2020թ. Արցախում կայանալիք նախագահական ընտրությունների թեկնածու Արայիկ Հարությունյանը՝ անդրադառնալով Արցախի Պաշտպանության բանակի նախկին հրամանատար Սամվել Բաբայանի կողմնակիցների այն հայտարարությանը, որ Արցախում պետք է լինի միասնական թեկնածու։
«Ես չեմ կիսում այն միտքը, որ տարբեր գործիչներ հայտարարում են, որ Արցախում պետք է լինի միասնական թեկնածու։ Թե ի՞նչ իշխանություն է ձեւավորվելու, որոշելու է ժողովուրդը, իր ընտրության եղանակով։ Դուք ո՞վ եք, որ դուք եք որոշում՝ ով պիտի լինի թեկնածու։ Կա Սահմանադրություն, Սահմանադրության համապատասխան՝ ցանկացած ոք իրավունք ունի առաջադրվելու, եւ ժողովուրդն է որոշելու՝ ով է լինելու նախագահը, եւ ինչ քաղաքական ուժեր են մասնակցելու։ Իսկ այդ մարդկանց խորհուրդ եմ տալիս զբաղվել քաղաքականությամբ, եթե քաղաքական գործիչներ են, եւ ներկայացնեն ծրագիր, իրենց պապայի տեղ չդնեն՝ որոշեն, ով ունի իրավունք առաջադրվելու եւ դառնալ թեկնածու։ Գոնե ձեր շուրջը հավաքեք մի քանի հոգի կամ օրենքի համապատասխան քաղաքական ուժ ձեւավորելու համար թիմ, հետո քաղաքական հայտարարություններ արեք։ Այսօր «Ազատ հայրենիքը» հայտարարում է՝ դեմ է միասնական թեկնածուին։ Կարող են լինել կոալիցիոն թեկնածուներ, պայմանավորվածություններ, համաձայնություններ»,- ասաց Արայիկ Հարությունյանը։
Սամվել Բաբայանի այն հայտարարությանը, որ Արցախի նախագահ Բակո Սահակյանը պետք է հեռանա մինչեւ ընտրություններ եւ չեզոք անձ թեկնածություն ներկայացնի, Հարությունյանն ասաց, որ այդ տեսակետը չի կիսում.
«Չեմ կիսում այն տեսակետը, որ պետք է Բակո Սահակյանը հրաժարական տա, եւ ինչ-որ անկախ թեկնածու պետք է լինի։ Այդ իրավունքը տված է ժողովրդին։ Երկրի ղեկավար կազմի ընտրության իրավունքը տրված է ժողովրդին։ Ոչ Սամվել Բաբայանը, ոչ Արայիկ Հարությունյանը իրավունք չունեն թելադրելու քաղաքական պրոցեսներում»։
Հարցին՝ արդյոք Արցախի նախագահը կարող է երկրում կայանալիք նախագահական ընտրությունների արդար անցկացումն ապահովել, Հարությունյանն ասաց, որ ոչ թե Բակո Սահակյանը պետք է երաշխավորի, այլ՝ Սահմանադրությունն ու օրենքը։