Պատասխանը պարզ է՝ Արցախը Հայաստան է, եւ վերջ. Նիկոլ Փաշինյան
Արցախը Հայաստան է, եւ վերջ: Այս մասին այսօր Ստեփանակերտում իր ելույթի ժամանակ հայտարարել է ՀՀ վարչապետ Նիկոլ Փաշինյանը, ով մասնակցում է Համահայկական 7-րդ խաղերի բացմանը:
Վարչապետը մանրամասն թվարկել է մինչեւ 2050թ. Հայաստանի նպատակներն ու նշել.
«Շատերը կհարցնեն՝ ինչո՞ւ ոչինչ ասված չէ Արցախի մասին: Պատասխանը պարզ է՝ Արցախը Հայաստան է, եւ վերջ: Ծրագրերը կիրականացվեն մինչեւ 2050թ.; Օրինակ, առողջապահության 100% հասանելիություն մենք կտրամադրենք ավելի շուտ: Կառավարությունը մինչեւ 18 տարեկանների համար բյուջեի հաշվին բժշկական եւ հիվանդանոցային ծառայությունների իրականացման որոշում է կայացրել»:
Նրա խոսքով՝ հանրահավաքից հետո մարդիկ կքննարկեն ծրագրերի իրատեսական լինելը:
«Յուրաքանչյուր հայ պետք է իրեն երկու հարց տա եւ պատասխանի դրանց՝ ցանկանո՞ւմ է նա արդյոք, որ Հայաստանը լինի այդպիսի Հայրենիք, եւ պատրա՞ստ է նա արդյոք ստեղծել այդպիսի Հայրենիք: Դա սկզբունքային հարց է: Իրատեսական ծրագրերը մեզ այլեւս պետք չեն: Մեզ պետք են անիրական ծրագրեր: Այն ծրագրերը, որոնք բոլորն անհնար են համարում, հայ ժողովուրդը ապացուցել է, որ անիրականը կարելի է իրականացնել»,- նշել է Փաշինյանը՝ հավելելով, որ այդ նպատակով անհրաժեշտ է կոնսոլիդացնել ողջ հայության ջանքերը:
Ընդ որում, Փաշինյանը նկատել է, որ համաձայն չէ այն պնդման հետ, որ կապիտալն ու ներդրումները հայրենիք չունեն: Նրա խոսքով՝ դա Հայաստանն է ու Արցախը, եւ դրա բազմաթիվ պնդումներ կան՝ Քըրք Քըրքորյան, Վաչե Մանուկյան, Էդուարդո Էռնեկյան, Սամվել Կարապետյան, Ռուբեն Վարդանյան եւ շատ ուրիշներ: