Հայաստանում սեռական բնույթի հանցագործությունների եւ ծանր հոգեկան տրավմաների թիվը կարող է հասնել մի քանի տասնյակ հազարի
Սեռական բնույթի հանցագործությունների եւ ծանր հոգեկան տրավմաների թիվը, որոնց մասին զոհերը չեն տեղեկացնում իրավապահ մարմիններին, Հայաստանում կարող է հասնել մի քանի տասնյակ հազարի։ Այս մասին ասել է հոգեբույժ, հոգեթերապեւտ, Երեւանի պետական բժշկական համալսարանի հոգեբուժության ամբիոնի դասախոս Արամ Հովսեփյանը հուլիսի 29-ի մամուլի ասուլիսում։
Փորձագետը տեղեկացրել է, որ միայն վերջին չորս տարում իրեն մասնագիտական օգնության համար դիմել է ավելի քան 100 մարդ, որոնք ենթարկվել են սեռական կամ հոգեբանական բռնության։ Եթե բազմապատկենք այս տվյալները երկրում աշխատող մասնագետների թվով, որոնք հոգեբանական օգնություն են մատուցում (մոտ 100 հոգեբույժ եւ 1000 հոգեբան), ապա վերոնշյալ հանցագործությունների զոհերի թիվը կարող է հասնել տասնյակ հազարների։
Հովսեփյանը նշել է, որ բռնության դեպքերն արձանագրվում են այդ թվում նաեւ ընտանիքի ներսում։ «Հայաստանում եղել են դեպքեր, երբ ծնողները մահու չափ ծեծել են երեխային։ Ես անձամբ տասնյակ անգամներ լսել եմ սեռական բռնության դեպքերի մասին մերձավոր արյունակիցների կողմից։ Բայց բռնության փաստերի ճնշող մեծամասնությունն ընտանիքի ներսում չի հրապարակվում»,- նկատել է նա։
Գիտականորեն հիմնավորված վիճակագրության բացակայության հետ կապված՝ Հայաստանում ֆիզիկական, սեռական եւ հոգեբանական ճնշման տարածման մասշտաբների մասին դժվար է դատել։ Միեւնույն ժամանակ, հասարակությունում շատերը հակված չեն կոշտ վերաբերմունքը դիտարկել որպես բռնության դսեւորում՝ համարելով, որ, օրինակ, ամեն սեռական ոտնձգություն չէ, որ հանգեցնում է հոգեբանական տրավմայի։
Այնինչ, բռնության ցանկացած ձեւի բախված մարդիկ սկսում են վախ զգալ, եւ այդ հետեւանքները կարող են լուրջ հետք թողնել հետագա ողջ կյանքի վրա։ «Մենք կարող ենք օգնել մեղմելու հետեւանքները, բայց ի զորու չենք ջնջել զոհի հիշողությունից հուշերը, որոնք սեւ բծի պես մնում են նրա հոգում»,- նշել է Հովսեփյանը։
Նրա խոսքով՝ երբեմն մարդն առաջին անգամ բռնության փաստի մասին համարձակվում է խոսել հասուն տարիքում, 30-35 տարեկանում։ Միեւնույն ժամանակ, դեպքերի մեծ մասում անգամ ծնողները տեղյակ չեն լինում կատարվածի մասին։