Հուրգադայում մնացած եւ այսօր Երեւան ժամանած քաղաքացիները հիմնականում գոհ չեն եղել հյուրանոցի պայմաններից
Հուրգադայում մնացած եւ այսօր Երեւան ժամանած քաղաքացիները հիմնականում գոհ չեն եղել այն հյուրանոցի պայմաններից, որում իրենց տեղավորել էին Հուրգադա-Երեւան թիվ OTF 3703 չվերթի չեղարկումից հետո։
Քաղաքացիներից մեկը լրագրողների հետ զրույցում նշեց, որ իր կինն ու երեխաներն էին Հուրգադայում մնացած քաղաքացիների թվում, որոնք շարունակել են մնալ այն հյուրանոցում, որտեղ ամբողջ հանգստի ընթացքում եղել են։ Նրա խոսքով՝ այն հյուրանոցը, որն առաջարկվել է քաղաքացիներին չվերթի չեղարկումից հետո, վատ պայմաններ է ունեցել եւ նրանք ստիպված են եղել հետ վերադառնալ։
Մեկ այլ ուղեւոր նշեց, որ տուրօպերատորին զանգել են, այնտեղից նշել են, որ խնդիրը կլուծվի։ Նա հավելեց, որ հյուրանոցում սնունդն էր վատը, իսկ համարում պայմանները լավն էին։
Քաղաքացիներից մեկն էլ գոհ էր, որ չվերթի չեղարկումից հետո իրենց ապահովել են հյուրանոցային համարներով եւ սնունդով, եւ նաեւ որ Եգիպտոսում ՀՀ դեսպանատանը պատասխանել են քաղաքացիների բոլոր զանգերին։
Ավելի վաղ Եգիպտոսում ՀՀ դեսպանությունը տեղեկացրել էր, որ հուլիսի 25-ին Հուրգադա-Երեւան թիվ OTF 3703 չվերթի չեղարկման պատճառով այս պահի դրությամբ Հուրգադայում գտնվում է մոտ հարյուր ՀՀ քաղաքացի։
Փոխվարչապետ Տիգրան Ավինյանը մի քանի ժամ առաջ հայտնել էր, որ մեկնարկել է կառավարության կողմից ֆինանսավորած Հուրգադա-Երեւան UJ 5600 չարթերային թռիչքը եւ շուրջ երեքուկես ժամից Հայաստանի Հանրապետության 132 քաղաքացիներ կլինեն հայրենիքում։ Հավելենք, որ նախատեսվում է եւս մեկ թռիչք իրականացնել հուլիսի 29-ի առավոտյան։
Ըստ նախնական տեղեկությունների՝ չվերթի չեղարկման պատճառն այն է, որ «Էյ ընդ Ար Տուր» հայկական տուրօպերատորը չի վճարել ավիափոխադրողին։