Մեծ Բրիտանիան չի հրաժարվի Իրանի հետ միջուկային գործարքից՝ լցանավի կալանումից հետո

Միացյալ Թագավորությունը մտադիր չէ հրաժարվել Գործողությունների համատեղ համընդգրկուն ծրագրից (ԳՀՀԾ) այն բանից հետո, երբ Իրանը Հորմուզի ծոցում բրիտանական լցանավ է կալանել։ Այս մասին հայտարարել են Մեծ Բրիտանիայի ԱԳ նախարարությունում։

Գերատեսչությունում ընդգծել են, որ կշարունակեն հետևել համաձայնագրի դրույթներին՝ մյուս մասնակիցներին ևս կոչ անելով կատարել իրենց պարտավորվածությունները։

ԱԳՆ-ում հավանական են համարել Թեհրանի նկատմամբ պատժամիջոցները։

Հիշեցնենք, ավելի վաղ Operativ լրատվականը հաղորդել էր, որ Bloomberg Television-ին տված հարցազրույցում Իրանի ԱԳ նախարար Ջավադ Զարիֆը սպառնացել էր, թե՝ Իրանը կարող է փակել Հորմուզի նեղուցը, սակայն չի ուզում անել այդ:

Դրան հաջորդեց լուրը, թե հուլիսի 19-ի երեկոյան Իսլամական հեղափոխության պահապանների կորպուսի (ԻՀՊԿ, Իրանի զինված ուժերի մի մասը) ՌԾՈւ-ն Հորմուզի նեղուցում, Իրանի տարածքային ջրերում կալանել էր բրիտանական Stena Impero լցանավը եւ հետագայում ուղեկցել Բենդեր Աբաս նավահանգիստ։ Լցանավի անձնակազմը՝ 23 մարդուց բաղկացած, այդ թվում երեք ռուսաստանցի, նավի վրա է մնում, բայց նավի տերը չի կարողանում կապվել նրանց հետ։ Իրանական իշխանություններն ասել են, որ լցանավը խարիսխ է գցել նավահանգստում։

Բրիտանիան Հորմուզի նեղուցում լցանավի կալանման կապակցությամբ «լուրջ հետևանքներով» սպառնացել է Իրանին :

Միջադեպը իրանական իշխանությունների փաստացի պատասխանն է հուլիսի 4-ին Ջիբրալթարում իրանական լցանավի կալանմանը։ Grace 1 նավը կալանվել էր Սիրիայի դեմ ԵՄ պատժամիջոցները խախտելու կասկածանքով։ Հետաքննության շրջանակում ոստիկանությունը կալանել է կապիտանին, ավագ օգնականին եւ անձնակազմի երկու անդամի։ Դատարանը նրանց կալանքի ժամկետը երկարաձգել է մինչեւ օգոստոսի 15-ը։

Բրիտանական Stena Impero լցանավի անձնակազմի բոլոր 23 անդամները պետք է մնան նավում մինչ անվտանգության վերաբերյալ հետաքննության ավարտը: Այս մասին հայտարարել էր Հորմոզգանի նավահանգիստների և նավագնացության կազմակերպության տնօրեն Ալլահ Մորադ Աֆիֆիպուրը:

Սաուդյան Արաբիան իր հերթին միջազգային հանրությանը կոչ էր արել զսպել Իրանի ագրեսիան. «Իրանը պետք է իմանա, որ նրա գործողությունները, մասնավորապես բրիտանական լցանավի կալանումը, միանգամայն անընդունելի են» :