Մանվել Գրիգորյանի գործով քննարկվում է փորձագետ ներգրավելու հարցը

Մանվել Գրիգորյանն առողջական վիճակի պատճառով չի ներկայացել այսօրվա դատական նիստին։ Այս մասին այսօր՝ հունիսի 23–ին Երևանի ընդհանուր իրավասության դատարանի Կենտրոնի նստավայրում հայտարարեց գործով նախագահող դատավոր Մնացական Մարտիրոսյանը։

Այսօրվա նիստին պաշտպանական կողմի միջնորդությամբ բժիշկ–էնդոկլինոլոգ Լուսինե Մամիկոնյանը ներգրավվեց Մանվել Գրիգորյանի նկատմամբ նշանակված միջգերատեսչական դատաբժշկական փորձաքննությունն իրականացնող հանձնաժողովի կազմում։

Մարտիրոսյանը դատարանին հայտնեց, որ 18 տարվա աշխատանքային փորձ ունի, որից 5 տարին բաժնի պետ է եղել։

Դատարանը փորձագետին պարզաբանեց իր իրավունքներն ու պարտականությունները: Մեղադրող դատախազ Վահե Դոլմազյանը հայտարարեց, որ փորձագետին բացարկ հայտնելու հարցի վերաբերյալ դիրքորոշում կհայտնի նրա աշխատանքային փորձի վերաբերյալ համապատասխան փաստաթղթերին ծանոթանալուց հետո։ Այսպիսով դատական նիստը մեկ ժամով ընդմիջվեց. Դատարանը ժամանակ տվեց բժշկուհուն համապատասխան փաստաթղթերը ներկայացնելու համար։

Հիշեցնենք, որ օրեր առաջ Մանվել Գրիգորյանի գործով նախագահող դատավոր Մնացական Մարտիրոսյանը բավարարել էր Գրիգորյանի առողջական վիճակի հարցով միջգերատեսչական դատաբժշկական փորձաքննություն նշանակելու վերաբերյալ դատախազների միջնորդությունը՝ փորձաքննության կատարումը հանձնարարելով Առողջապահության նախարարության համապատասխան մարմնին։

Հիշեցնենք, քիչ առաջ Operativ լրատվականը ուղիղ հեռարձակմամբ հաղորդել էր, որ շարունակվում է Մանվել Գրիգորյանի գործով դատական նիստը: